Wasiirka Warfaafinta, Dhaqanka iyo Dalxiiska Mudane Maxamed Cabdi Xayir (Maareeye) oo ay wehlinayeen Maareeyaha Golaha Murtida iyo Wacyigelinta, Maareeye ku xigeenka iyo Xubno ka tirsan Hobollada Waaberi, ayaa waxay booqdeen Fanaannadda Qaran ee Seynab Xaaji Cali Siigaale (Baxsan) oo muddo xannuun dhinaca wadnaha ah kula jirta mid ka mid ah isbitaallada Muqdisho.
Qaar ka mid ah Ehellada Fanaannadda oo warbixin siinayay Wasiirka iyo Masuuliyiintii la socotay ayaa sheegay in xannuunkan uu muddo dheer hayo, cilladduna ay dhanka Wadnaha tahay, sidoo kale waxa ay tilmaameen in Dhaqaatiirtu ay xaqiijiyeen in xaaladeeda aan waxba Dalka gudihiisa looga qaban karin.
Wasiirka Warfaafinta, Dhaqanka iyo Dalxiiska Mudane Maxamed Cabdi Xayir (Maareeye) ayaa sheegay in uu ka xun yahay xanuunka fanaannadan Qaran, waxa uu hoosta ka xariiqay in ay dadaal badan ku bixinayaan sidii Caafimaad dibedda ah loogu qaadi lahaa Seyban.
Seynab Xaaji Cali Baxsan oo hadda ah qof da’ ah waxaa lagu xusuustaa kaalintii ay Fanka Soomaaliyeed ku lahayd iyo taariikhdii dhinaca Suugaanta, Wasiir Maareeya ayaana muujiyey in daryeelka fanaanniintu uu yahay waajibaad saaran wasaaradda dowladda oo dhanna ay ka go’an tahay sidii looga dhabeyn lahaa wax u qabashada Baxsan iyo dadka la mid ahba.
