Wasiirka Warfaafinta, Dhaqanka iyo Dalxiiska XFS Mudane Cabdifataax Qaasim Maxamuud ayaa gelinkii dambe ee maanta soo xiray Shirweynaha Madasha Qaran ee Istiraatiijiyadda Xiriirka Warbaahinta oo labo maalmood ka socday Muqdisho.
Shirka oo ay soo qaban qaabisay Wasaaradda Warfaafinta, Dhaqanka iyo Dalxiiska Xukuumadda Federaalka waxaa ka qeyb galay Wasiirrada Warfaafinta Dowlad Gobolleedyada iyo Gobolka Banaadir waxaana muddadii labada maalin ahayd ee uu socday diiradda lagu saaray ” Istiraatiijiyadda xiriirka Warbaahinta, halka ku dhigga shirka ee sanadkan ayaana ahaa ” Qaabeynta Mustaqbalka Warbaahinta ee Xilligan casriga ah”,
Shirweynaha ayaa isku keennay madaxda Dowladda Dowladda Federaalka, kuwa maamul gobolleedyada, Khubarro warbaahineed iyo daneeyeyaal, iyadoo si weyn looga dooday qaabeynta iyo mustaqbalka warbaahinta casriga ah.
Wasiirka Warfaafinta Cabdifitaax Qaasim Maxamuud oo gaba-gabada shirka ka hadlay ayaa sheegay in Dowladda Federaalka ay muhiimad gaar ah siinayso dhismaha hannaan joogto ah oo lagu xoojinayo wada-shaqeynta heer Federaal iyo heer Dowlad Goboleed, gaar ahaan casriyeynta warbaahinta, horumarinta warfaafinta Dowladda, Dhaqanka iyo Dalxiiska, wadaagga xogta, kobcinta xirfadaha iyo la jaanqaadidda isbeddellada casriga ah ee warbaahinta.
Sidoo kale, Wasiirrada Warfaafinta Dowlad-gobolleedyada iyo masuuliyiinta ka socotay maamulka Gobolka Banaadir ayaa dhankooda shirka ku soo bandhigay aragtiyahooda, caqabaha heer gobol iyo talooyinka ku saabsan sidii loo horumarin lahaa wada-shaqeynta iyo xooojint Warbaahinta.
Shirkan ayaa qayb ka ah dadaallada madasha labaad ee Istiraatiijiyadda Xiriirka Warbaahinta Soomaaliyeed 2026 ee lagu xoojinayo wada-tashiga, iskaashiga iyo dejinta jihada mustaqbalka Warbaahinta.
