Wasiirka Warfaafinta XFS Maxamed Cabdi Xayir (Maareeye ) ayaa xarunta wasaaradda ku soo dhaweeyay Wasiirka Warfaafinta iyo isgaarsiinta Jamhuuriyadda Jabuuti mudane Ridwaan Cabdillaahi Bahdoon oo shalay soo gaaray caasimadda dalka.
Wafdiga wasiirka Warfaafinta Jabuuti oo uu wehliyay safiirka Jabuuti u fadhiya dalkeena iyo masuuliyiin kale ayaa qayb qeyb u booqday waaxyaha Warbaahinta Qaranka oo ay ku jiraan TV ga, Radio Muqdisho iyo Keydka Radiyaha oo xasuus gaar ah uleh dalka aan walaalaha nahay ee Jabuuti halkaas oo ay masuuliyiintu intii ay booqanayeen Keydka dhageysteen heeso iyo gabayo ay qaden fanaaniin Soomaaliyeed kuwaas oo lagu dhiiri galinayay gobanima doonkii Jabuuti oo ay Soomaaliya hormuud ka aheed.
Masuuliyiinta wasaaradda oo uu hormuud u yahay Wasiirka Wasaarada warfaafinta, dhaqanka iyo dalxiisaka Maxamed Cabdi Xayir ayaa wafdiga Jabuuti warbixin ka siiyay shaqooyinka wasaaradda ay u hayso Qaranka iyo qaabka ay u shaqeyso.
Wasiirka wasaaradda Warfaafinta iyo isgaarsiinta Jabuuti mudane Ridwaan Cabdillaahi Bahdoon ayaa uga mahad celiyay madaxda wasaaradda soo dhaweyntooda.
Intaa ka dib wasiir Maareeye ayaa xafiiskiisa kulan kula qaatay wafdigii ka socday Jamhuuriyadda Jabuuti oo ay ka wada hadleen sidii dowladda Jabuuti gacan uga geysan lahayd tayeynta iyo xoojinta warbaahinta Qaranka.
