Wasiirka Tamarta iyo Kheyraadka Biyaha ee Xukuumadda Federaalka Soomaaliya ayaa maanta xafiiska ku qaabishay Wefdi ka socda hey’adda IOM iyo urur goboleedka IGAD, waxayna ka wada hadleen fulinta mashaariic lagu dhisayo xarumaha Wasaaradda.
Mas’uuliyiinta labada dhinac ayaa kulan ku yeeshay xafiiska Wasiirka Marwo Fowzia Maxamed Sheekh, ayagoo ka wada arinsaday hirgelinta mashaariic lagu dayactirayo xarumaha Wasaaradda Tamarta oo deegaameysan doonta xaruntii hore ee Wakaalada Biyaha Xamar ee Degmada Wadajir.
Hey’adda socdaalka Aduunka ee IOM ayaa Wasaaradda ka taageertay dhismaha xarunta sheybaarka biyaha iyo goobo kale, waxaana kulankii maanta si gaar ah looga hadlay dhismaha xarunta Wasaaradda, kaas oo dhowaan bilaaban doona sida uu qorshuhu yahay.
Dhaqaalaha ku baxa mashaariicdan ayaa waxaa bixinaya Bankiga Horumarinta Afrika iyo Urur goboleedka IGAD, iyadoo Hey’adda socdaalka Aduunka ee IOM ay fulinta ka gacan siinayso Wasaaradda Tamarta iyo kheyraadka Biyaha ee Xukuumadda federaalka Soomaaliya.
Kulanka waxaa goob joog ka ahaa, Wasiir ku-xigeenka Wasaaradda Cismaan Libaax Ibraahim, qaar kamid ah Agaasimiyaasha Wasaaradda iyo saraakiil ka kala soctay hey’adda IOM iyo IGAD.
