Wasiirka Wasaaradda Xanaanada Xoolaha, dhirta iyo daaqa ee Xukuumadda Federaalka Soomaaliya mudane Xasan Xuseen Maxamed (Eelay) oo uu wehliyay Wasiirka Dekadaha Xukuumadda Federaalka Soomaaliya mudane, Cabdullaahi Axmad Jaamac Ilkajiir, ayaa maanta xarigga ka jaray xarumo cusub oo ay Wasaaradda Xannaanada Xoolaha ka hirgelisay Dekedda weyn ee Magaalada Muqdisho.
Xarumahan oo kala ah Sheybaarka dhexe ee Xoolaha, qeybta shahaado bixinta, xarunta dhexe ee Wasaaradda iyo goobaha xoolaha lagu nasiyo inta aan laga dhoofin Dekadda, ayaa waxaa maalgeliyay Bangiga horumarinta Afrika, waxana fulisay hey’adda Save the Children.
Dhinaca kale, Wasiirka Dekedaha iyo Gaadiidka Badda Xukuumadda Federaalka Soomaaliya Mudane Cabdullaahi Axmad Jaamac Ilkajiir, ayaa Wasaaradda Xannaanada Xoolaha ku bogaadiyay higelinta xarumaha muhiimka u ah, wuxuuna rajo ka muujiyay in goor dhowr Dekadda Muqdisho laga billaabo dhoofinta xoolaha nool ee Dalka.
Ugu dambeyn Wasiirka xanaanada xoolaha, Dhirta iyo Daaqa Xukuumadda Federaalka Soomaaliya Mudane Xasan Xuseen Maxamed, ayaa sheegay in xarumaha la dhisay ay wax badan ka tari doonaan horumarinta dhoofka xoolaha oo ka mid ah ilaha dhaqaale ee ugu muhiimsan dalka.
