Wasiirro ka tirsan Galmudug iyo Senator Siciid Siyaad ayaa kormeer ku tagay magaalada Baxdo ee Gobolka Mudug, halkaas oo ay soo gaareen dad Al-Shabaab ay ka soo barakiciyeen Koofurta Mudug, iyagoo kormeeray kaam ay deegaan ku meel gaar ah ka samaysteen ilaa 8-boqol oo qoys oo xilliyo kala duwan ka soo barakacay koofurta Mudug.
Wasiirka Gargaarka iyo Maaraynta Masiibooyinka Galmudug Cabdiraxmaan Makaawe ayaa sheegay in qoysaskan oo hadda ka hor aan helin kaalmada hay’adaha samafalka ay deg deg ugu baahanyihiin Hoy, Cunno iyo agabka maacuunta.
Dhinaca kale Wasiirada iyo Senator-ka ayaa kulan la qaatay maamulka iyo bulshada deegaanka Baxdo, waxaana ay u gudbiyeen baahiyaha magaalada ka jira, kuwaas oo ay ugu horreeyaan dhinacyada caafimaadka, Waxbarashada, caawinta barakacayaasha, dhismayaasha xarumaha maaulka iyo waddooyinka, sida uu sheegay Gudodomiyaha Baxdo Maxamed Cabdullaahi.
Wasiiru dawlaha arrimaha Gudaha Galmudug Axmed Xasan Cali ayaa xusay in ka Wasaarad ahaan ay ka shaqaynayaan inay Baxdo hesho Layrka cadceedda ku shaqeeya iyo dhismayaasha maamulku ku shaqaynlahaa.
Ugu dambayn Senator Siciid Siyaad ayaa bulshada Baxdo ku baraarujiyey inay ka qaybqaataan dagaalka lagula jiro Al-Shabaab, isagoo balan qaaday inuu u istaagayo sidii Baxdo ay xuquuqdeeda horumarineed uga heli lahayd Galmudug iyo dawladda Federaalkaba.
Wafdiga maanta Baxdo booqday ayaa ka koobnaa Wasaaradaha Waxbarashada, Arrimaha Gudaha, Xanaanada Xoolaha iyo Wasaarada Bey’ada Galmudug oo uu weli Wasiir ka yahay Senator Siciid Siyaad.
