Wasiirka hub ka dhigista iyo dhaqancelinta maleeshiyaadka ee maamulka koofur galbeed Soomaaliya, wasiirka warfaafinta iyo mas’uuliyiin kale ayaa gaaray degmada Waajid ee gobolka Bakool sida ay sheegeen mas’uuliyiinta degmada.
Guddoomiye ku xigeenka degmada Waajid Caddow C/raxmaan Jugle, oo la hadlay Radio Muqdisho ayaa sheegay imaatanka mas’uuliyiinta ka socotay dowlad goboleedka koofur galbeed uu yahay in tababar u soo xiraan ciidan kamid ah daraawiisha maamulka oo halkaasi tababar ugu soo gabageboobay.
Caddow, ayaa intaa raaciyay in dhowaan ay qorsheynayaan in la furo wadooyinka degmada oo ay go’doomiyeen kooxda Al-shabaab isla markaana dhibaato dhanka nolasha ah ay ka jirto halkaasi.
“Waxaan damacsanahay in ay furaan wadooyinka degmada soo gala isla markaana cadowga ku jira ka saaraan,” ayuu yiri Caddow Jugle.
Guddoomiye, ku xigeenka ayaa ugu dambeyntii waxaa uu sheegay in xaaladda ka dhanka nolasha ee degmada ka jirta ay tahay mid aad u liidata qaabka keli ah oo raashiin lagu kaani karona ay tahay gaari dameero oo mararka qaar maleeshiyaadka ay dilaan dadka iyo dameerada raashiinka lagu soo qaado.
