Sida ballantu aheyd waxaa maanta guddiyada Baarlamaanka ay horey usii dhaqaajiyeen su’aallo weeydiinta iyo ka baaraan degidda qorshayaasha laga doonayo Wasaarradaha Xukuumadda Federaalka Soomaaliya waxaana maanta la qaabilay ilaa lix Wasiir ayadoo kulammadaasina ay shir guddoominayeen Guddoonka Baarlamaanka.
Gudoomiyaha Baarlamaanka Federaalka Soomaaliya Mudane Maxamed Sheekh Cusmaan “Jawaari” ayaa shir guddoomiyey kulan howleed ay guddiga Warfaafinta iyo Isgaarsiinta ee Baarlamaanka Soomaaliya ku qaabileen Wasiirka Wasaaradda Warfaafinta,dhaqanka iyo dalxiiska Mudane Maxamed Cabdi Xayir Maareeye oo ay wehliyeen Agaasimaha guud ee Wasaaradda iyo agaasimaha Warbaahinta, waxaa sidoo kale guddigu isla maanta qaabileen Wasiirka Wasaaradda Boostada iyo Isgaarsiinta Mudane Guuleed Xuseen Qaasim.
Afhayeenka Baarlamaanka ayaa tilmaamay inaanay jirin haba yaraatee wax xifaaltan ah oo u dhaxeeya laamaha fulinta iyo sharci dejinta laakiinse muhiimaddu ay tahay in wadajir loo wada shaqeeyo si loo gaaro halka la hiigsanayo.
“laanta sharci dejinta oo ah Baarlamaanka iyo laanta fulinta oo ah Xukuumadda Federaalka tartan kama dhaxeeyo ee xisaabtan ayaa ka dhaxeeya, wadashaqeyntana waan ula jeedaa xitaa Federaalka aan dhiseyno waa Federal iskaashi ah, maanta waxaan ku jirnaa waqti Soomaaliya dib u dhis lagu hayo siyaasadeeda waxeyna u baahan tahay kuligeen inaan gacanta is qabsano oo uu noo tilmaansan yahay yoolka aan dooneyno inaan gaarno wadajirna aan ku gaarno ayadoo la xisaabtamayo oo loo xisaabtamayo si dimuqraadi ah oo aan cidna loogu tureynin si aan isula qaadno waxaan u baahan nahay inaan ogaano qorshihiina,guddigana uu hadhoow idiinkaga difaaco meelaha dhibaatadu ka imaan karto”.
Gudoomiye ku xigeenka Koobaad ee Baarlamaanka Mudane Jeeyaani Nuur Iikar ayaa isaguna shir guddoomiyey kulan howleed ay guddiga Maalliyadda iyo Qorsheynta ee Baarlamaanka ku kala qaabileen Wasiirka Wasaaradda Maalliyadda Mudane Maxamed Aadan Ibraahin “Fargeeti” iyo Mudane C/raxmaan Yuusuf Cali Ceynte Wasiirka Wasaaradda Qorsheynta iyo Iskaashiga caalamiga ah.
“sidaas ayey maanta noogu soo gebagebowday kulan howleedkii guddiga Maalliyadda ee Baarlamaanka oo shir lalahaa wasaaradaha qorsheynta iyo maalliyadda waxaanna ku faraxsanahay in wasaarradahaasi ay qorshayaashooda oo faah faahsan usoo gudbiyeen guddiga taasina waxey cadeynaysaa wadashaqeynta guddiga iyo wasaarradaha iney adag tahay oo ay sii socon doonto, waxaan rajeynayaa in sharciyada laga rabo labadooda ay sida ugu dhaqsiyaha badan noosoo gaarsiiyaan insha Allah” ayuu yiri Gudoomiye ku xigeenka Koobaad ee Baarlamaanka Mudane Iikar.
Gudoomiye ku xigeenka Labaad ee Baarlamaanka Mudane Mahad Cabdalla Cawad ayaa isaguna shir guddoomiyey kulan howleed ay guddiga Garsoorka ee Baarlamaanka ku qaabileen Wasiirka Wasaaradda Awqaafta iyo Arrimaha Diinta Mudane C/qaadir Sheekh Cali “Baqdaadi” iyo Wasiirka Garsoorka Mudane C/laahi Axmed Jaamac “Ilka jiir” oo ay wehlisay Wasiir ku xigeenka Wasaaradda waxaana uu Gudoomiye ku xigeenka ka hadlay muhiimadda dhismaha maxkamadda dastuuriga ah.
“arinkan waa dhaaftay waqtigii loogu talagalay oo Xukuumaddu laheyd, laba bilood ayey heysatay oo fursad ah, labo sano ilaa seddex sano ayaana lasoo dhaafay oo waqtigii dowladda ayaaba dhammaan raba marka arinkan dib u celin kale ma oglin hadii kale waxey noqoneysaa in ay siyaasado kale jiraan oo la rabo iney maxkamadani dhisanto” ayuu hadalkiisa kusoo gebagebeeyey Mudane Mahad Cabdalla Cawad Gudoomiye ku xigeenka Labaad ee Baarlamaanka.
Kulammo howleedyadan u dhaxeeya guddiyada joogtada ah ee Baarlamaanka iyo Wasaarradaha Xukuumadda ayaa sii socon doona ilaa inta ay kasoo gebageboobaan kulammada lala yeelanayo 25 Wasiir ee Xukuumadda Federaalka Soomaaliya.
