Wasiiru-dowlaha amniga Qaranka Amb. Farxaan Cali Axmed oo safar shaqo ku jooga Magaalada Dhuusamareeb ayaa maanta kormeer shaqo ku tagay xarunta dhaqancelinta Galmudug (DRP) ee loogu talo galay in lagu soo dhaweeyo dhallinyarada kasoo baxda kooxda Al-Shabaab si loogu sameeyo nolol, isla markaana loo fahamsiiyo dowladnimada.
Wasiiru dowlaha oo uu la socday guddoomiye kuxigeenka Amniga iyo Siyaasada ee Magaalada Dhuusamareeb, waxa ay halkaasi warbixin kaga dhageysteen maamulka xarunta taaasoo la xiriirtay xaaladda dhallinyarada iyo baahiyaha xarunta maadaama ay qayb ka tahay xarumaha ku yaala dowlad goboleedyada dalka ee hoostaga wasaaradda amniga Qaranka.
Agasimaha barnaamijka dhaqan celinta Galmudug Cabdirahman Maxamed Cali iyo guddoomiye ku-xigeenka amniga iyo Siyaasada Dhuusamareeb Cabdi Xaashi Caroole ayaa dhankooda tilmaamey in xaruntani ay ka qayb qaadato amniga guud maadaama ay kujiraan isisoo dhiibayaal ka faa’iideystay fursadan.
Wasiiru-dowlaaha amniga Qaranka Amb. Farxaan Cali Axmed ayaa ugu dambeyn u ballan qaaday maamulka xaruntan in ay heli doonaan garab istaag balaaran.
Xaruntan dhaqan celinta Galmudug waxaa si rasmi ah loo furay 29-Dec 2021 ,waxaana haatan ku jira dhallinyaro doortay in ay dib ula midoobaan qoysaskooda,kadib marka ay soo dhameystaan fursad lagu barayo xirfado ay ku maareeyaan noloshooda .
