Wasiiru Dowlaha Wasaaradda Warfaafinta Dhaqanka iyo Dalxiiska Mudane Maxamuud Cabdi Xasan Bekos oo ka qayb galaya shir looga hadlayay kaalinta Warfaafinta ku qaadan karto ka hortaga iyo ciribtirka Argagaxisada, oo ayna kasoo qayb galayeen Wasiirada Warfaafinta Dowladaha Carabta ayaa waxa uu kulan la qaatay Wasiirka Warfaafinta Dowladda Suudaan Dr. Axmed Bilaal Cusmaan.
Sidoo kale Wasiir Bekos ayaa kulan la qaatay Wasiirada Dalxiiska iyo Dhaqanka e Dowladda Suudaan iyagoo ka wada hadlay xariirka labada dal gaar ahaan sidii iskaashi ay u sameen lahaayeen Wasaaradda WarfaafintaΒ Soomaaliya iyo Wasaaradahaas.
Wasiiru Dowlaha oo kulan la qaatay Wasiirka Warfaafinta Suudaan ayaa marka hore ka warbixiyay xaaladda siyaasadeed ee Soomaaliya xiligan marayso iyo sida ay Wasaaradda Warfaafinta Dowladda Federaalka u shaqayso xiligan iyo horumarka wayn ee tiigsatay Wasaaradda.
Wasiir Bekos ayaa ayaa u sheegay Wasiirka Warfaafinta Suudaan in ay jiraan baahiyo badan oo ay wasaaradda qabto oo ay ka mid tahay tababaro wariyaasha loo sameeyo iyo in xooga la saaro in la helo TV u gaar ah luuqada carabiga oo bilow iyo dhamaad laga soo daayo heeso iyo barnaamijyo carabi ah si ay ula jaan qaadaan walaalahood carbeed.
Wasiirka Warfaafinta Suudaan Axmed Bilaal Cusmaan oo isagana ka hadlay ayaa u mahadnaqay marka hore in wasiir ahaan soo ajiibo martiqaadkii Wasaaradda loo fidiyay ee ay shirka uga soo qayb galeen oo ay Dowladda Suudaan sanadkan marti galinaysay.
Bilaal ayaa u sheegay in Dowladda Suudaan mar walba ay garab taagan tahay dowladda ay walaalaha yihiin ee Soomaaliya ayna diyaar u tahay sidii ay taageero dhan walba ah ugu fidin lahayd.
Sidoo kale Wasiiru Dowlaha ayaa kulan la qaatay Wasiirka Dhaqanka ee Dowladda Suudaan Mudane Attayib Xasan Badawi isagoo xafiiskiisa ku qaabilay ayaa waxa ay ka wada hadleen sidii labada dowladood gaar ahaan labada wasaaradood isaga kaashan lahaayeen is dhexgalka iyo in dhaqanka midba midka kale u faafiyo maadaama ay yihiin labada shacab ee Soomaaliya iyo Suudaan dad isku dhaqan dhaw.
Waxa oo kale uu Wasiir Maxamuud Cabdi Xasan Bekos kulan kula qaatay xafiiskiisa Wasiirka Dalxiiska ee Dowladda Suudaan Maxamuud Abu Zayd Mustafa iyagoo ka hadlay sida dalxiiska laysaga kaashan lahaa iyo khibrahana laba dhan laysku dhaafsan lahaa.
Wasiiru Dowlaha ayaa sheegay in Soomaaliya xiligan nabad ka hana qaaday dowladdana ay dadaal ugu jirto sidii loo soo celin lahaa sidii dalxiis wadanka loogu imaan lahaa, dhanka amaankana maalmahan uu aad uga wanaagsan yahay xiliyadii hore.
Wasiirka Dalxiiska ee Dowladda Suudaan Maxamuud Abu Zayd ayaa sheegay in ay dhinacooda diyaar u yihiin in ay xariir iskaashi sameeyaan labadaas wasaaradood layskana kaashado tababarada iyo sida loo qurxiyo xarumaha iyo meelaha loo dalxiis tago ee labada dowladood leeyihiin.
Wasiir Bekos ayaa Khartoum uga qayb galay shir ay Soo baabushay jaamacadda Carabta ayna Dowladda Suudaan gaar ahaan Wasaaradda Warfaafinta Suudaan ay soo qaban qaabisay.
