Mas’uuliyiin iyo Xildhibaano ka tirsan Dowlad Gobaleedka Galmudug ayaa ka qeyb galay kulan lagu taageerayay waxqabadka maamulka Dowladda hoose ee Galkacyo, kaasoo lagu qabtay xarunta Gobalka Mudug ee Galkacyo.
Kulankaan oo ahaa mid lagu taageerayay waxqabadka maamulka dowlada hoose ee dagmada Galkacyo ee dowlad gobaleedka Soomaaliyeed Galmudug ayaa waxaa ka qeyb galay mas’uuliyiin iyo Xildhibaanno ka tirsan dowlad gobaleedka Galmudug iyo boqalaal ruux oo ka kala socday bulshada qeybahooda kala duwan ee ku nool magaalada Galkacyo.
Ugu horeyna waxaa kulanka ka hadlay qaar ka mid ah bulshadii iyo mas’uuliyiintii kulanka ka soo qeybgalay kuwaasoo soo dhaweeyay waxqabadka muuqda ee maamulka dagmada Gaalkacyo ka sameeyeen magaalada Galkacyo labadii sano ee u danbeeysay, kuwaasoo ay ka mid ahaayeen hirgelinta xarumo kala duwan oo kuwa adeega bulshada, dhismaha waddooyinka iftiiminta magaalada xiliyada habeenkiiya iyo hagaajinta bilicda iyo arrimo kale
Xildhibaan Maxamed Cabdiqaadir Xaashi oo ku hadlayay magaca mudanayaashii ka qeyb galaya kulanka ayaa sheegay in wax weyn xiligani ay iska badaleen dhanka horumarka iyo bilicda magaalada Galkacyo labadii sano ee u danbeeysay, taasoo ay ku amaananyihiin maamulka dowladda Hoose, isagoo dhanka kalena ugu baaqay bulshadu iney ka qeyb qaataan dhismaha dalkooda, isla markaana ay noqdaan kuwa canshuurta bixiya.
“Waxaan bogaadinayaa bilicda iyo horumarka magaalada Gaalkacyo, waxaana rajeeynayaa inuu noqdo horumar ku baaha guud ahaan deegaanada Galmudug, waxaana hubaal ah in muwaadin loo aqoonsanyahay qofkii canshuur bixiya, kana qeyb qaata horumarinta dalka, sidii dalkeenu u dhismo aan bixino canshuurta” ayuu yiri Xildhibaanka.
Ugu danbeeyna duqa magaalada Galkacyo Mudane Bile Diini Cali oo kulanka ka hadlay ayaa uga mahadceliyay bulshada Gaalkacyo doorkii ay ka qaateen in ay qabsoomaan waxyaabo badan, isagoo dhinaca kale ka dhawaajiyay in weli ay wax badan dhimanyihiin loona baahan yahay in aan la daalin, shacabkuna ay ku gacan siiyaaan dhameeystirka waxyaabaha dhiman ee la higsanayo.
