Website-ka Radio Muqdisho oo ka mid ah website-yada loogu booqashada badan yahay ayaa dib u habeyn iyo balaarin lagu sameeyay,iyadoo Mas’uuliyiinta Wasaaradda Warfaafinta Soomaaliya ay sheegeen in isbedel lagu sameeyay qaab dhismeedka Website-ka Radio Muqdisho islamarkaana lagu soo kordhiyay Luqadaha Carabiga iyo English-ka oo dadka ay ka daalacan doonaan.
Agaasimaha Radio Muqdisho C/rixiin Ciise Cadow ayaa faah faahin ka bixiyay isbedelka lagu sameeyay bage-ka isagoo sheegay in la balaariyay maanta oo ah maalinta ugu horeysa sanadka cusub ee 2015-ka dadka Soomaaliyeedna ay ka heli doonaan wararkii ugu dambeeyay oo wata sawiro oo ku qoran luqadaha Soomaaliga,English-ka, iyo Carabiga.
Agaasimaha Warbaahinta Qaranka C/raxmaan Yuusuf Sheekh Al Cadaala oo isna ka hadlay dib u habeynta lagu sameeyay Bage-ka Radio Muqdisho ayaa sheegay in mar walbo ay u taagan yihiin horumarinta Warbaahinta Qaranka iyo in dadka Soomaaliyeed ay helaan wararka iyo dhacdooyinka jira, waxaana uu sheegay ku soo kordhitaanka ay ku soo kordhiyeen luqadaha website-ka in ay tahay in dadka ajaanibta ee ku sugan dalka iyo dibadda in ay helaan dhacdooyinka iyo wararka jira.
