Ugu yaraan labo qof ayaa ku dhimatay 15 kalana waa ay ku dhaawacmeen weerar isuga jira rasaas iyo isqarxin oo xalay ka dhacay magaalada Vienna ee xarunta dalka Austria .
Rag hubeysan ayaa rasaas ku furay meelo kala duwan oo ka mid ah bartamaha magaalada halkaas oo ay dadku buuxeen .
Weerarka ayaa dhacay sideedii fiidnimo waqtiga Vienna .
Wasiirka arimaha gudaha ee Austria ayaa weerarka ku tilmaamay mid argagaxiso.
Weerarkii ugu horeeyay ayaa ka dhacay meel u dhow xarun dadka yahuuda ay ku kulmaan oo cibaado ahaan iyo xafiisyo arimaha bulshada yahuuda ka shaqeeya ay ku leeyihiin .
Sidoo kale qof ka mid ah kuwii weerarka soo qaaday ayaa la sheegay in uu isqarxiyay.
Boolisku waxa ay sheegeen in ay dileen mid ka mid ah kooxaha weerarka fuliyay.
Waxaa la xiray wadooyinka soo gala bartamaha magaalada waxaana boolisku raadinayaan xubnihii weerarka soo qaaday.
Duqa magaalada Vienna,Michael Ludwig ayaa sheegay in 7 ka mid ah dadka dhaawaca ah ay xaaladoodu culustahay.
