Ciidamada Ammaanka ee Soomaaliya iyo kuwa midowga Africa ee Amisom ayaa ka hortagay weerar Kooxaha nabad diidka ah UGUS ee Al Qaacida ay ku qaadeen xarunta madaxtooyada maamulka koonfur galbeed Soomaaliya ee magaalada Beydhabo.
6 ruux oo ay ku jiraan dhagarqabayaashii weerarka Soo qaaday ayaa ku geeriyooday, waxaana ciidamada oo aad u feejignaa ay si dhaqsa leh weerarkaasi naf la caarinimada ah kaga hortageen kuwaasi oo u diiday in gudaha madaxtooyada ay galaan kaddibna toogtay dhagar qabayaashaasi oo tiradoodu eheyd 3 ruux.
Wasiirka Warfaafinta maamulka koonfur galbeed Soomaaliya Xasan Maxamed Cabdi oo la hadlay warbaahinta Qaranka ayaa faah faahin ka bixiyay weerarkaasi, isagoo sheegay in ciidamadu si dhaqse leh kaga hortageen ciidamada islamarkaana maleeshiyaadka ka tirsan UGUS ee weerarka soo qaaday ay dileen haddana xaalada magaalada ay tahay mid wanaagsan baaritaanana ay wadaan wixii ka soo baxa ay u soo gudbin doonaan warbaahinta.
Ururka Gumaadka Ummadda Soomaaliyeed ee UGUS oo wajahaya guul darooyin waaweyn oo kaga imaanaya Ciidamada qalabka kuwaa oo ku jabiyay dagaalada ay la galeen kooxdaasi islamarkaana ay ka saareen magaalooyin iyo degmooyin ka tirsan gobolada Dalka, ayaa awoodoodii waxa ay ku soo koobeen in ay isku qarxiyaan meelaha dadka ay ku badanyihiin mar haddii awoodoodii aysan u babac dhigi Karin ciidamada qalabka sida.
