Iyadoo bishii November ee sanadkan ay hay’adaha Qaramada Midoobay oo kala ah WFP iyo UNHCR ay soo saareen go’aan ah in la dhimo raashiinka la siiyo Qaxootiga ku nool Xerooyinka Dhadhaab iyo Kaakuma ee dalka Kenya oo 50% raashiinkii la siin jiray laga jaray ayaa hadda waxa soo baxay in go’aankaasi wax iska bedeleen isla markaana dib loo soo celiyay raashiinkii markii hore laga jaray Qaxootiga sida uu saxaafadda u sheegay Axmed Warsame oo kamid ah Mas’uuliyiinta hay’adda UNHCR ee Qaramada Midoobay u qaabilsan Qaxootiga.
Warsame ayaa intaa ku daray in sababta ka dambeysa in go’aankii ay markii hore gaareen ay tahay kadib markii dhaqaale ka heleen dowladda Boqortooyada Sacuudi Carabiya oo kamid ah dowladaha dhaqaakaha ay Qaxootiga ugu talagaleen u soo marsiya hay’adaha Qaramada Midoobay.
“1-da bisha Janaayo ee sanadka 2015-ka hay’adaha Qaramada Midoobay waxaa ay bixin doonaan raashiin dhameystiran, waana arin muhiim u ah dadka Qaxootiga ah oo halkan ku nool, waxaa sidoo kale halkan booqasho ku yimid wafdi ka socoda Midowga Yurub waxayna u kuurgaleyeen xaaladda dadka Qaxootiga ah” ayuu yiri Axmed Warsame.
Mas’uulkan ka tirsan UNHCR ayaa tilmaamay in ay dhaqaale dheeraad ah ka jaynayaan Bangiga horumarinta Islaamka si hay’adaha Qaramada Midoobay ay sii wadaan u adeegida Qaxootiga boqolaalka kun kor u dhaafay eek u nool Dhadhaab iyo Kaakuma ee dalka Kenya.
