Madaxweyneyaasha Puntland iyo Jubbaland ayaa goor dhow gaaray magaalada Cadaado, iyagoo ka qeyb galaya munaasabada caleema saarka Madaxweynaha Galmudug Axmed Ducaale Geelle Xaaf.
Wafuud kala duwan oo ka kala socota maamulada dalka ayaa ku qul qulaya Cadaado, iyadoo wafuudan ka qeyb galayaan xaflada caleema saarka Madaxweynaha dhowaan la doortay ee Galmudug.
Madaxweynaha Galmudug Axmed Ducaale Geelle Xaaf, ku xigeenkiisa iyo Wasiirka Arrimaha Gudaha ayaa ku soo dhoweeyay wafuuda magaalada Cadaado.
Madaxweynaha Puntland C/wali Gaas, ayaa markii u horeysay gaaray Cadaado oo xarun KMG u ah Maamulka Galmudug, waxaana dad badan arrintan ku tilmaameen mid sare u qaadi doonta nabad ku wada noolaanshaha labada maamul.
Sidoo kale, waxaa goor dhow gaaray Cadaado ergeyga gaarka ah ee xoghayaha guud ee Qaramada Midoobey u qaabilsan Soomaaliya Danjire Micheal Keating iyo wakiilo ka socda Beesha Caalamka.
Madaxweynaha Soomaaliya Maxamed C/llaahi Farmaajo ayaa goor dhow gaari doonta magaalada Cadaado, si uu ugu qeyb galo munaasabada caleema saarka.
Ciidanka dowladda iyo AMISOM ayaa ammaanka magaalada Cadaado ayaa si weyn u adkeeyay.
