Waxaa maanta degan xaaladda deegaanka Deefow oo shalay ay ku dagaalameen maleeshiyo beeleedyo ka soo jeeda labo beel oo wallaalo ah, iyadoo ay isa soo tarayaan baaqyo loo jeediyo in si sharuud la’aan ah lagu joojiyo dagaalka.
Wariyaha Warbaahinta Qaranka ee Gobolka Hiiraan Cabdishakuur ayaa ku soo waramay in saaka ay xaaladdu degantahay, isla markaana ay socdaan dadaallo ku aadan sidii loo xalin lahaa waxa sababbay gacan ka hadalka, iyadoo odoyaasha dhaqanka oo la hadlay Warbaahinta ay baaqyo u direen maleeshiyaadka ku dagaallamay deegaanka Deefow oo qiyaastii 25 km dhanka Waqooyi kaga beegan magaalada Beladweyne ee xarunta Gobolka Hiiraan.
Dagaalka ayaa inta la ogyahay waxa uu ka bilowday dhul beereed ay labada dhinac kala sheegteen lahaanshiyahiisa, waxaana waxgaradka iyo culimada ay soo jeediyeen in wax waliba lagu xaliyo miiska wada hadalka.
