Xaaladda magaalada Gaalkacyo ayaa saaka deggan kaddib markii shalay halkaasi ay ku dagaalameen ciidamo kala taabacsan maamullada Puntland iyo Galmudug.
Wariyaha nooga soo warama Gaalkacyo C/risaaq Maxamed Axmed ayaa soo sheegaya in xaaladda magaaladaasi ay saaka deggantahay oo aan la maqleynin shanqarta rasaasta, inkastoo uu tilmaamay in ciidamadii dagaalamay ee labada dhinac ay weli is horfadhiyaan.
Related posts
Dagaalkii shalay oo la isu adeegsaday madaafiic ayaa la sheegay in ay ku dhinteen in ka badan tobon qofood oo isugu jiray rayid iyo ciidan, halka tiro ka badan labaatanna ay ku dhaawacmeen.
Bulshada ku dhaqan magaalada Gaalkacyo ayaa ka welwelsan dagaalkaasi iyo cawaaqib xumida ka dhalankarta, iyagoo walaac ka muujinaya suurtagalnimada in xabaddu ay markale dib u bilaabato maaddaama ay ciidamadu is horfadhiyaan.
Waxaa soo baxaya baaqyo nabadeed oo lagu dalbanayo in la joojiyo gacan ka hadalkaasi, kuwaasoo ka imaanaya waddaniyiinta ka damqanaya dhibaatada soo gaareysa dadka abriyada ah ee aan waxba galabsan.
