Xafiiska caafimaadka iyo faya dhawrka ee gobolka Banaadir oo uu maamulka Gobolka ka furay Muqdisho ayaa waxaa u qaabilsanyahay la socodka xaaladda caafimaad ee goobaha ganacsiga ee ku yaalla caasimada.
Agaasimaha Waaxda Caaafimadka ee gobolka Banaadir Dr Cabdullaahi Xasan Maxamed Nuune ayaa sheegay in xafiiskan uu ahmiyad gaar ah u leeyahay faya dhowrka, isla markaana uu wax tar badan u leeyahay bulshada, isagoo tilmaamay in howlo badan ay horyaallaan.
Taliyaha ciidanka degaanka ee gobolka Banaadir Gashaanle Sare Axmed Xuseen Mahdi oo ka hadlay furitaanka xafiiska ayaa sheegay in ciidanka iyo saraakiisha ka tirsan ilaalinta degaanka Xamar ay gudan doonan waajibaadka kaga aadan hirgelinta sharuucda xafiiska u degsan.
Guddoomiye ku-xigeenka maamulka iyo maaliyada ee gobolka Banaadir Mudane Ismaaciil Macalin Cabdi Guure oo furay xafiiska caafimaadka iyo faya dhowrka ee gobolka Banaadir ayaa shegay in xafiiskan uu wax weyn ka tari doono adeegyada sare u qaaidda caafimaadka dadka ku nool Muqdisho, isagoo ku tilmaamay in tani ay tahay tallaabo horumar leh.
