Xaflad lagu maamuusayey Maalinta caalamiga ah ee 8 March ayaa lagu qabtay Magaalada Minneapolis ee gobolka Minnesota waxaana xafladani ka qeyb galay masuuliyiin ka socotay gobolka Minnesota iyo Xildhibaanad Sacdiyo Xaaji Salaad iyo Halyeeyada Soomaaliyeed Hibo Maxamed Hudoon Hibo Nuura iyo Masuuliyiin kale.
Munaasabadani lagu maamuusayey Maalinta haweenka Aduunka ayaa waxaa soo qaban qaabisay ururka USUROON oo ah urur u dooda Xaquuqda haweenka iyo dhalaanka.
Marti sharaftii ka qeyb gashay Munaasabdani ayaa goobta ka jeediyey hadallo ay uga warrameen ahmiyadda haweenka Soomaaliyeed oo ay sheegeen inay kaalin mug-weyn ka qaataan dadaallada lagu xaqiijinayo nabadgalyada, dib u dhiska iyo horumarka dalka Soomaaliya.
Waxaa kaloo ay sheegeen in la ilaaliyo xuquuqda haweenka Soomaaliyeed oo la xoojiyo ay dar-dar galinayso horumarka dalka iyo dadka Soomaaliyeed.
Xildhibaan Sacdiyo Xaaji Salaad oo ka qeyb gashay kulankani lagu xusayey maalinta haweenka aduunka oo la hadashay Talveshinka Qaranka Soomaaliyeed ayaa u mahadcelisay ururka Usuroon iyo dumarkii soo qaban qaabiyey barnaamijkani.
Munaasabadani intii ay socotay ayaa waxaa abaalmarin qaali ah la gudoonsiiyey Halyeeyada Soomaaliyeed Hibo Maxamed Hudoon Hibo Nuura ka dibna waxay hambalyo u dirtay Haweenka Soomaaliyeed meel walba oo ay aduunka ka joogaan.
ugu danbeyntii Fartuun Weli oo ah Madaxa Sare ee Ururka Isuroon oo barnaamijkani soo qaban qaabiyey ayaa sheegtay in ay muhiim tahay in dumarka Soomaaliyeed isku duubnaadaan.
Si kastaba ha ahaatee maanta oo kale ayaa aduunka oo dhan loogu dabaal degay maalinta haweenka Aduunka waxayna ku soo aadaysaa xilli abaaro xoogan uu ka jirto qeybo ka mid ah dalka Soomaaliya.
Liban Xuseen
