Munaasabad ballaaran oo loogu dabaaldegayay Sanadguurada 55 aad ee xoriyadda Soomaaliya gaar ahaan gobolada Waqooyi isla markaana lagu weynaynayay maalmaha Xorriyadda Jamhuuriyadda Soomaaliya ee 26 ka Juune iyo 1da Luulyo ayaa lagu qabtay magaalada Tromso ee Woqooyiga Dalka Norwey.
Munaasabaddan oo ay si heer sare u soo qabanqaabiyeen madaxda guddiga Jaaliyadda Soomaaliyeed ee magaalada Tromso ayaa waxaa kasoo qeybgalay dadweyne aad u fara badan oo ku nool magaaladaasi, iyadoo sidoo kalena lagu casuumay wakiillo ka socday qeybo kamid ah magaalooyinka dhaca Woqooyiga iyo Koofurta dalka Norwey.
Munaasabadda ayaa intii ay socotay Waxaa suugaan aad ay ugu riyaaqeen dadweynaha kusoo bandhigtay madasha lagu qabtay munaasabadda Fannnaannada Soomaaliyeed, iyadoo ku labisan dharka muujinaya astaanta quruxda badan ee calanka Soomaaliya oo helitaankiisa lagu bixiyey dedaal iyo halgan dheer.
Guddoomiyaha Jaaliyadda Soomaaliyeed ee magaalada Tromso Mustafa Cumar Faarax oo goobta khudbad ka jeediyay ayaa ugu horeyn ugu hambalyeeyay ummadda Soomaaliyeed munaasabadda sanadguurada 55aad ee kasoo wareegatay Maalmaha xorriyada isagoo tilmaamay in guddiga Jaaliyadda ay juhdi aad u sarrreeya ku bixiyeen qabsoomidda xafladani heerkeedu sarreeyo waxa uuna ugu baaqay in muwaadiniinta Soomaaliyeed ee ku nool magaalada ay si dhaw ula shaqeeyaan guddiga jaaliyadda kuna dedaalaan midnimada iyo isku xirkooda.
Sidoo kale waxgaradkii kale ee kasoo qeybgalay xafladda ayaa ku dheeraaday ka hadalka taariikhdii iyo halgankii dheeraa ee loo soo maray gobannimada aan maanta hoos harsaneyno waxaana dadkaasi kamid ahaa Cali Daahir Maxamed, Abdirahman Colaad iyo Axmed Biyoon kuwaas oo oo kamid ahaa masβuuliyiintiiΒ lagu casuumay munaasabadda .
Sanad kasta waxaa maalmaha 26ka Juune iyo 1.da luulyo laga xusaa dhammaan gobollada dalka Soomaaliya iyo daafaha adduunka oo ay Soomaalida ku nooshahay munaasabada lagu weyneynayo maalmaha Xorriyadda Jamhuuriyadda Soomaaliya oo hatan ay kasoo wareegatay muddo 55 sano ah iyadoo ay halgameyaal Soomaaliyeed ay dhabarka u xirteen inay iska saaraan heeryadii gummeystihii Talyaaniga iyo Ingiriiska ee xilligaas gacanta ku hayay gobollada Koofurta iyo Waqooyiga dalka Soomaaliya islamarkaana ay gobolladaasi goβaansadeen inay midnimadoobaan iskuna biiraan taariikhdu markii ay aheydΒ 1 dii luulyo ee sanadkii 1960.
