Xaflad sogootin ah uu ma’suuliyadda ku wareejinayay ku Xigeenkii 1aad ee Xeer Ilaaliyaha Guud Ee Qaranka Muuse Macallin Maxamed oo dhawaan loo magacaabay Guddoomiyaha Maxkamadda Gobalka Banaadir ayaa maanta lagu qabtay Xafiiska Xeer Ilaaliyah Guud Ee Qaranka.
Xafladda waxaa ka soo qeyb galay Xeer Ilaaliyaha Guud Ee Qaranka, Ku Xigeenada Xeer Ilaaliyaha , Agaasimayaasha Xafiiska iyo dhammaan shaqaalaha kale Ee Xafiiska Xeer Ilaaliyah Guud Ee Qaranka.
Madaxweyne Maxamed Cabdulaahi Farmaajo ayaa Todobaadkan bilowgiisa Wareegto uu soo saaray wuxuu xilka Guddoomiyaha Maxkamadda Gobolka Banaadir ugu magacaabay Garyaqaan Muuse Macallin Maxamed oo muddo ka soo shaqeynayey Garsoorka dalka, sidoo kalena ku takhasusay Shareecada iyo Qaanuunka.
Tallaabadan uu qaaday Madaxweynaha ayaa ku saleeysan ballanqaadkiisii ahaa inuu dib u habayn ku sameeyo nidaamka garsoorka dalka oo kamid ah qorsheyaasha ugu muhiimsan ee dowladda horyaalla.
