Ra’isul wasaaraha Dowladda Fedraalka Soomaliya iyo Guddoomiyaha Gobalka Banaadir ayaa si wadajir ah u dhagax-dhigay Dhismaha cusub ee Xarunta Hay’adda Socdaalka iyo Jinsiyadaha ee Dowladda Soomaliya oo laga hirgelinayo nawaaxiga Madaarka Aadan Cadde ee magaalada Muqdisho.
Waxaa ka qeyb galay Munaasabadda Dhagax dhigga Mas’uuliyiin uu kamid ahaa Wasiirka Amniga Dowladda Federaalka Mudane C/risaaq Cumar Maxamed, Agaasimaha Guud ee Hay’adda Socdaalka iyo Jinsiyadaha ee Dowladda Mudane Maxamed Aadan Jimcaale (Koofi ) Taliyaha Ciidanka Boliiska Soomaaliyeed, saraakisha NISA, Guddoomiyaha Degmada Waabari iyo Masuuliyiin kale.
Agaasimaha Guud ee Hay’adda Socdaalka iyo Jinsiyadaha ee Dowladda Soomaliya Mudane Maxamed Adan Jimcaale (Koofi) ayaa ugu horreyn warbaahinta u sheegay in Hay’adda Socdaalka iyo Jinsiyadaha ay guul weyn u tahay iney hesho dhul ay iyada lee dahay oo ku shaqeyso.
Guddoomiyaha Gobalka Banaadir ahna Duqa Magaalada Muqdisho Mudane Yuusuf Xuseen Jimcaale (Madaale) ayaa tilmaamay in Dowladda Hoose ee xamar ay dhulkan u bixisay si loogu adeego Qaranka.
Ra’iisul Wasaaraha Dowladda Fedraalka Soomaaliya Mudane Xasan Cali Khayre ayaa warbaahinta ka sheegay in ay muhiim tahay dhulalka ay Dowladda leedahay in lagu shaqeeyo si loo ballaariyo dowladnimada.
Waa markii ugu horreysay Hay’adda Socdaalka iyo Jinsiyadaha ee Dowlada Soomaliya yeelato Dhul ay leedahay iyadoo horey xarunta ugu shaqeyn jirtay dhismooyin kiro ah.
