Xildhibaan Yuusuf Ibraahim Afrax oo ka mid ah mudanayaasha golaha shacabka ayaa maanta cutubyo ka tirsan ciidanka Xoogga dalka ee howlgallada ka wada inta u dhexeysa Muqdisho iyo Marka ee dhanka xeebta la qaatay kulan qado ah kaddib markii uu gaarsiiyay xoolo iyo raashin.
Ciidanka maanta uu u tegay Xildhibaanka ayaa dhawaan waxa ay maleeshiyaadka Al-Shabaab ka saareen jidka u dhexeysa Marka iyo Muqdisho ee dhanka xeebta, halkaasi oo ka mid ahayd goobihii Al-Shabaab ay dadku ku dhibaateyn jireen, waxaana ay ciidamadu halkaasi ka sameeyaan howlgallo lagu xaqiijinayo amniga.
Taliyaha Ururka 28aad guutada koowaad ee ciidanka Xoogga dalka Kornayl Cabdiqaadir Nuur Xasan (Qoondhe) ayaa Xildhibaanka iyo xubnihii la socday warbixin ka siiyay xaaladda wadada isku xirta Marka iyo Muqdisho oo uu sheegay inay tahay mid amni ah, isla markaana ay ciidamadu had iyo jeer halkaasi ka wadaan howlgallo joogto ah.
Jeneraal Cabdi Cali Jamaame Abaanduulaha qeybta 12-ka April oo Xildhibaanka ka guddoomay neef geel ah ayaa uga mahadceliyay dhiiri gelinta uu u sameynayo ciidamada Xoogga dalka, waxaana uu intaa ku daray inay joogteynayaan howlgallada ka dhanka ah argagixisada Al-Shabaab.
Xildhibaan Yuusuf Ibraahim (Yuusuf kabaale) ayaa sheegay in ujeeddada socdaalkiisa ay la xiriirtay ka warqabka xaaladda ay ku suganyihiin geesiyaasha naftooda u huraya difaaca dalka, waxaana uu ciidamada ku booriyay inay dar dargeliyaan sidii guud ahaan deegaannada ay ku dhuumaaleysanayaan argagixisada Al-Shabaab ay uga xoreyn lahaayeen.
