Dugsiga Al-Bahsiir , waxa uu ku yaallaa degmada Waaberi ee gobolkan Banaadir, waxaa wax ku barta adey Soomaaliyeed oo indha la’, dhismaha dugsigan waa guri kiro ah uma sameysna xarun waxbarasho, laakiin daruufaha ayaa keenay in halkaan ay ardeydu wax ku bartaan,.
Xarunta dugsiga Al-Bashiir, waxa uu ka kooban yahay Fasallada lagu bixiyo casharrada iyo qolalka ay Jiiftaan, iyagoo isugu jira Wiilal iyo Gabdho aad u da’yar, waxaana ay halkaas ku qaataan nolol maalmeed u dhigma midka dadka caadiga ah ama aragga heysta oo kale.
Mustafa Sheekh Cali Dhuxulow, waa mudane ka tirsan Barlamaanka Federaalka ee Soomaaliya, waxaa uu isku dayey in uu si dhow ula socda xaaladda Waxbarasho ee Carruurta aragga la’ ee dusgiga Al-Basiir, si uu u dhiirageliyo rajada ay leeyihiin.
Xildhibaan Mustafa Sheekh Cali Dhuxulow, ayaa tagay xarunta dugsiga ay ardeydu ku sugan yihiin, halkaas ayuuna ku soo arkay sida niyad wanaagga leh ee ay diyaarka ugu yihiin in ay xoojiyaan hamiga waxbarasho caruurta ardeyda ah, xildhibaanka ayaa gudaha u galay fasallada casharada ay ku qaadanayeen, waxa uu wareystay qaar ka mid ah wiilasha iyo gabdhaha fasallada fadhiyey.
Xildhibaanka, waxaa wehliyey Abuukar Cawaale “Qaad-diid” waxa uu yiri “waxaan la qiiroodey in ay Muqdisho ku sugan yihiin ardey Soomaaliyeed oo aragga la’ hadana leh mustaqbal wanaagsan, laakiin waxaa nawada saaran inaan u istaagno sidii aan u caawin laheyn, maadaama u nagu hoggaamiyey Xildhibaan Mustafa Sheekh Cali Dhuxulow”.
Waxaan gudaha u galnay qeybaha Jiifka ee ay Ardeydu seexdaan, halkaas waxaa ka muuqdey Sariiraha ay ku jiiftaan oo u baahan in wax badan laga badelo, waxaana war-bixin ka hadleysa xaaladda Dugsiga Al-Basiir na siiyey Maamulaha dugsigaasi.
Xildhibaan Mustafa Sheekh Cali Dhuxulow oo uu wehliyo Abuukar Cawaale Qaad-diid, ayaa maamulka dugsiga Al-Basiir ku dhiirageliyey in Isbitaal la geeyo laba ka mid ah ardeyda aragga la’ oo la sheegay in ay suuragal tahay dib u soo celinta aragtidooda, waana mid ka mid ah rajada Mustaqbal ee ay leeyihiin carruurtaas arag la’aanta ah.
Maamulaha Dugsiga ardeyda Indhoolayaasha ah ee Al-Basiir, Abiikar Xuseen Bashiir, ayaa yiri “Waxaan si kale iyo laab ah ugu mahadcelinayaa Xildhibaan Mustafa Sheekh Cali Dhuxulow, oo noo muujiyey in ay ka go’antahay garab istaagga carruurtaan masaakiinta ah, waxaan ku talinayaa bulshada inteeda kale ay ku daydaan xildhibaanka”, isagoo si kooban u sharaxay baahiyaha ka jira Iskuulka Al-Bashiir.
Ardaydani ayaa hamigoodu ah mid sare iyagoo isku dayaya in ay ay horumar ka gaaraan waxbarashadooda, iyagoo aan waxba arag, waxaana muhiim ah in bulshada Soomaaliyeed iyo Dowladda Soomaaliya ay garab istaagaan ardaydani oo u baahan caawimaad dhab ah, waxaana booqashada Wasiir hore Xildhibaan Mustafa Sheekh Ay dhiira galin u tahay ardaydaasi iyo in bulshadu ay ku baraarugto Xaalada Ardaydani aragga la’ .
