Xildhibaan Xasan Cabdi Nuur oo ka tirsan Golaha Shacabka Baarlamanka Soomaaliya isla markaana kamid ahaa Wafdi ka socday Golayaasha Dowladda oo deeq Dawo ah gaarsiiyay xarumaha caafimaad ee magaalada Baydhabo oo lagu dabiibayo shacabkii ku dhaawacmay Qaraxyadii Maleeshiyaadka Argagaxisa Al-Shabaab ay shalay geysteen, ayaa xusay in shacabka iyo madaxda maamulka Koofur galbeed ay aad ugu farxeen kana mahadcelideen sida dhaqsiyaha leh ee ay Xukuumada Soomaaliya uga jawaabtay baaqii Madaxweynaha Jamhuuriyadda mudane Maxamed Cabdullaahi farmaajo ee ahaa in Gurmad deg deg ah lala gaaro shacabka ku waxyeeloobay Baydhabo.
“Tirada dhaawacyada waa 47,ruux isbitaalada ayaan ku booqanay ,waxaana Magaalada Muqdisho u soo qaadnay 8-qofood oo dhaawacyo culus qabay kuwaas oo daweyntooda ay dusha saaratay Dowladda Federaalka ah ee Soomaaliya “ sidaas ayuu yiri Xildhibaanka.
Sidoo kale Xildhibaan Xasan Cabdi Nuur ayaa sheegay in Gurmadka loo sameynayo shacabka ku waxyeeloobay Qaraxyadii Baydhabo uusan intaas ku ekaan doonin isla markaana ay socdaan dadaalo qeyb kale oo gargaar ah lagu geynayo Baydhabo si dadka ay dhibaateyeen cadowga loogu muujiyo garab istaag.
Qaraxyadii shalay ka dhacay magaalada Baydhabo ayaa waxaa ku dhintay ugu yaraan 20-ruux halka ku dhawaad 50 ay ku dhaawacmeen waxaana dadka geeriyooday iyo ku dhaawacmay oo dhamaantood ah shacab aan waxba galabsan balse la kulmay dhagarta Argagaxisada Al shabaab.
