Related posts
Kulankii ugu horreeyey Kalfadhiga Saddexaad ee Golaha Aqalka Sare Barlamaanka Federaalka Soomaaliya waxaa shir guddoominayey Mudane Cabdi Xaashi Cabdullaahi Guddoomiyaha Golaha aqalka Sare, waxaana kulanka looga hadlay weerarkii lagu qaaday Guriga Xildhibaan Cabdi Xasan Cawaale (Qeybiid) oo ka mid ah xildhibaanada Aqalka Sare
Guddoomiyaha Aqalka Sare Mudane Cabdi Xaashi Cabdullaahi oo ayaa sheegay in Kalfadhigaan Saddexaad howlo badan oo muhiim ah ay horyaalaan Golaha Aqalka Sare loona baahanyahay in xildhibaanada ay waqti galiyaan.
Intaasi ka dib Xildhibaan Cabdi Xasan Cawaale ayaa Golaha Warbixin ka siiyay weerarkii lagu qaaday gurigiisa 30-ka bishii December ee sanadkii tagay 2017.
Warbixinta xildhibaanka ka dib ayaa mudanayaasha Aqalka Sare waxay ka doodeen in arrintaan loo saaro guddi baaris ku soo sameeya iyo in loo yeero R/wasaaraha xukuumadda Soomaaliya si wax looga waydiiyo.
Qaar ka mid ah xildhibaanada ayaa soo jeediyay in arrintaan loo saaro guddi halka qaar kalana ay soojeediyeen in loo yeero R/wasaaraha, hayeeshee ugu danbayntii ayaa cod loo qaaday labadaasi aragti waxaana xildhibaanadu u codeeyeen in loo saaro guddi soo baara.
Ugu danbayntii xildhibaanada Aqalka Sare ayaa loo qaybiyay xeerka Dhowridda Gobanimada iyo Midnimada Soomaaliya kaas oo shalay ay meel mariyeen xubnaha Golaha Shacabka, waxaana loo balamay in maalinta barri ah ay ka doodaan xubnaha Aqalka Sare ee Baarlamaanka Soomaaliya.
