Guddoomiyaha Baarlamaanka Federaalka Soomaaliya Mudane Maxamed Sheekh Cusmaan “Jawaari” oo hadal ka jeediyey furitaanka kulanka Baarlamaanka ee maanta ayaa ugu horeyn howlwadeennada iyo Xildhibaannada Baarlamaanka uga tacsideeyey geerida ku timid Allaha u naxariistee Raxmo Maxamed Cabdiqaadir oo ka mid aheyd howlwadeennada Baarlamaanka oo saakay dhagarqabeyaal ay ku dileen degmada Wadajir ee gobolka Banaadir.
Xildhibaannada Golaha Shacabka ayaa sii gudagalay ka doodista Hindise Sharciyeedka Xeerka Isgaarsiinta Qaranka, kaasi oo maalmahan doodiisu ay ka socotay xarunta Baarlamaanka, waxaana dooda Xildhibaannada ee maanta ay ku qotontay guddiga ama hay’adda Isgaarsiinta Qaranka ee la doonayo in la sameeyo, in maamul goboleedyada dalka ka jira iyo shirkadaha isgaarsiinta laga talageliyo sameynta sharcigan, waxaase ay Mudaneyaashu Baarlamaanku ka sinnaayeen aragti ahaan baahida loo qabo in sharcigan la meel mariyo.
Afhayeenka Baarlamaanka Soomaaliya Mudane Maxamed Sheekh Cusmaan “Jawaari” oo gebagebadii kulanka ka hadlay ayaa tilmaamay in uu jiro mooshin ay Xildhibaanno ka tirsan Baarlamaanka kasoo gudbiyeen qodob ka mid ah Hindise Sharciyeedka Isgaarsiinta Qaranka, mooshinkaasina ay Xildhibaannadu u codeyn doonaan maalinta Isniinta ah hadii uu Alle idmo.
Dhinaca kale Xildhibaannada Baarlamaanka Federaalka Soomaaliya waxaa maanta loo qeybiyey dib u eegista Miisaaniyadda Dowladda ee sanadkan 2015taasi oo Golaha Wasiirradu soo ansixyeen 25-Jully-2015, waxaana sida uu qabo xeer hoosaadka Baarlamaanka qabo ay Xildhibaannadu soo akhrisan doonaan dib u eegista miisiiniyadda Dowladda mudo 48 saacadood ah kaddib kolkaasi oo akhrintaasi la gudageli doono.
