Kulanka Guud ee mudanayaasha Golaha Shacabka waxa ay ugu horeyn Xildhibaanada ay Akhrinta 1-aad marsiiyeen Mashruuc sharci ku saabsan xuquuqda Liil-tirka (Dheyma-Nololeedka) siyaasiyiinta Dowladda Federaalka Soomaaliya, waxaana Xildhibaan Faarax Cabdi Xasan oo ka tirsan guddiga xeer-hoosaadka,Anshaxa iyo Xasaanada ee Golaha Shacabka uu Xildhibaanada u faah faahiyay saameynta miisaaniyadeed uu yeelanaayo,isagoo xildhibaanada ka codsaday in ay soo aqriyaan si uusan waqtiga golaha uga qaadan.
Guddoomiye kuxigeenka labaad ee Golaha Shacabka Mudane Mahad Cabdalla Cawad ayaa Xildhibaanada u akhriyay muhiimada sharcigan uu leeyahay, isago tilmaamay in uu ahmiyad weyn ku fadhiyo.
Intaasi ka dib Xildhibaanada Golaha Shacabka ayaa guda galay Ajendaha labaad ee kulanka oo ahaa sii wadista dooda iyo ansixinta xeer hoosaadka golaha shacabka, waxayna xildhibaanada ay fikirkooda ka dhiibteen qodobada qaar ee xeer hoosaadka.
Guddoomiye ku-xigeenka labaad ee Golaha Shacabka Mudane Mahad Cabdalla Cawad oo kulanka soo xiray ayaa ugu baaqay Xildhibaanada maqan in ay kulamada yimaadaan maadaamaa xeer hoosaadka ansixintiisa ay tahay howl culus, wuxuuna habdhowrka golaha uu faray in ay guddoonka u gudbiyaan liiska Xildhibaanada kulamada guud ee golaha ka maqan.
