Mudanayaasha Golaha Shacabka ayaa ansixiyay Sharciga duulista rayidka ee hawada kadib kulan maanta ay Xildhibaannada ku yeesheen Muqdisho.
Kulanka oo uu shir guddoominayay Guddoomiyaha Golaha Shacabka Baarlamaanka Federaalka Soomaaliya mudane Maxamed Mursal Sheekh Cabdiraxmaan ayaa Xildhibaannadu waxa ay ka doodeen sharciga duulista rayidka.
Dood dheer kaddib Xildhibaannada Baarlamaanka Federaalka Soomaaliya ayaa ansixiyay sharciga duulista rayidka ee hawada, kaasi oo haa ku ogolaatay 140 Xildhibaan, hal xildhibaan uu diiday waxaana ka aamusay hal xildhibaan sida uu shaaciyay natiijada codeynta Guddoomiyaha Golaha Shacabka mudane Maxamed Mursal Sheekh Cabdiraxmaan.
Guddoomiyaha Guddiga Gaadiidka ee Golaha Shacabka Xildhibaan Cabdifataax Taahir ayaa golaha uga mahadceliyay sida ay u meel mariyeen sharcigan.
Wasiirka Gaadiidka iyo Duulista Hawada ee Xukuumadda Soomaaliya Mudane Maxamed Cabdulaahi Salaad Oomaar ayaa isna dhankiisa Xildhibaannada Golaha shacabka uga mahadceliyay sida ay ugu codeeyeen sharcigan, isagoo xusay in sharcigan uu wax badan ka qaban doono arrimaha Hawada Soomaaliya.
