Xildhibaanno, siyaasiyiin iyo mas’uuliyiin ka tirsan maamulka Gobolka Hiiraan ayaa waxa ay si wada jir ah u booqdeen xabsiga dhexe ee magaalada Baladweyne, iyagoo u kuur galayey xaaladda Xabsiga iyo maxaabiista ku xiran.
Xildhibaan Maxamed Amiin iyo mas’uuliyiinta la socday waxa ay kormeerkooda ku qotomay sidii ay ku ogaanayeen xaaladda maxaabiista ku jirta xabsiga Beladweyne, iyadoo mid mid u galay qolalka xabsiga dhexe, waxaana markiiay halkaasi gaareen ay warbixinno ka dhageysteen qaar ka tirsan saraakiisha ciidamada Asluubta ee gobolka ku sugan.
Guddoomiye ku-xigeenka Maamulka Gobolka Hiiraan Sheekh Xuseen Cismaan Cali ayaa sheegay in dib u dhiska lagu sameeyay xabsiga dhexe ay tahay mid ay gacan kageysteen Jaaliyadda reer Beladweyne ee dalka dibadiisa ku nool iyo shacabka gobolkaasi ku dhaqan, taasi oo suurtagelisay dib u howlgelinta xabsiga, waxaana uu wacad ku maray inay garab istaagi doonaan sidii loo ilaalin lahaa xuquuqda maxaabiista.
Xildhibaan Maxamed Amiin ayaa tilmaamay in ay dhiiri gelinayaan saraakiisha gatanta ku haysa xabsiga Beladweyne, ayna ku dadaalayaan sidii loo hirgelin lahaa xabsiyada kale ee gobolka ku yaalla.
