Xildhibaanno ka tirsan Baarlamaanka Federaalka ah ee Soomaaliya oo ka qeyb galay Shirka Baarlamaanada Afrika ee ka socda Wadanka Koofur Afrika ayaa kulanka hordhigay sidii wax looga qaban lahaa caqabadaha haysta xawaaladaha Soomaaliyeed ee Dalka Mareykanka oo dhawaan la xiray akoonadii ay ku lahaayeeen Bankiyada dalkaasi.
Xildhibaan Cabdicasiis Cabdullaahi Maxamed ayaa sheegay in shirka ay horgeeyeen sidii wax looga qaban lahaa xawaaladaha Soomaaliyeed, waxaana uu intaa ku daray in qodobkaasi uu shirka horyaalla, isla markaana laga soo saaro doono qodobo muhiim ah.
“Ajandaha aan hor dhignay shirka weli dood ayaa socota, Dhaqaalaha dadka dibada jira ay u soo diraan qoysaskooda, waxaa la isla gartay inay tahay dhaqaaale qeyb ka qaata horumarka dhaqaale, shirka waxaa kaloo looga hadlay caafimaadka, amniga, haweenka iyo carruurta” ayuu yiri Xildhibaanka.
Xildhibaan Sareedo Cabdalla Maxamed ayaa dhankeeda sheegtay in shirka uu ku socda si habsami leh, ayna rajeyneyso in shirka ay ka soo baxaan go’aanno waxtar u leh shacabka Soomaaliyeed.
“Shirka waxaa diiradda lagu saaray dhaqaalaha Midowga Afrika oo aad u liita sanadihii ugu dambeeyay, mana ku bixin dhaqaalihii loogu talagalay in ay ku baxaan meelihii loo baahnaa, taasna Madaxweyneyaasha Midowga Afrika ayay hortaalla inay wax ka yiraahdaan, laakiin waxaan anagu xoogga saareynaa waxbarashada, caafimaadka iyo amniga” ayay tiri Xildhibaan Sareedo.
Sawir Qaade:- Cabdullaahi Amiin Qorshe
