Kulan ay ka qeyb-galeen Xildhibaanno ka tirsan Barlamaanka Soomaaliya iyo maamulka Gobolka Bakool ayaa lagu qabtay magaalada Xudur ee xarunta Gobolkaas.
Kulankan oo si wada jir ah ay uga wada qeyb galeen mudanayaal ka tirsan Golaha Shacabka, Golaha Aqalka Sare, Maamulka Gobolka Bakool iyo xubno kale ayaa waxaa diiradda lagu saaray Barnaamijka gaarsii dowladda, oo hal ku dhig u ah mudanayaasha kulamada ay la qaadanayaan qeybaha bulshada.
Related posts
Guddoomiye ku-xigeenka Gobolka Bakool Cabdullaahi Maxamed Nuur oo kulanka ka hadlay ayaa sheegay inay ka qeyb galeen shir loo qabtay golaha deegaanka Xudur iyo Tiyeegloow, kaasi oo diiradda lagu saaray arrimo badan oo gobolka quseeya, isla markaana ay Xildhibaannada u gudbiyeen waxyaabaha ay tebayaan in wax laga qabto.
“Waxaan mudanayaasha u gudbinay baahida gaarka ah ee ka jirta Gobolka, waxaana rajeyneynaa inay wax ka qabtaan arrintaasi” ayuu yiri Guddoomiye ku-xigeenka Gobolka.
Xildhibaan Iimaan Cabdullaahi Cali ayaa xusay in waxyaabaha ugu muhiimsan ay bulshada ka cawdeen ay tahay dhanka amniga, anaguna waxaan sameyneynaa inaan arrintan u gudbino madaxda naga sareysa, si loo daboolo baahiyahooda.
Senator Xuseen Sheekh Maxamuud ayaa sheegay in maamulka iyo golaha wakiilada la kulmeen ay ka dhageysteen arrimo ay ugu horeyso amniga, waxaana uu intaa ku daray in maalmaha soo socda ay booqan doonaan xarumaha waxbarashada iyo caafimaadka, ayna la kulmo doonaan qeybaha kale ee bulshada ku nool degmada Xudur.
