Xoghayaha Arrimaha Dibadda waddanka Mareykanka Rex Tillerson ayaa Isniintii shaley gaaray waddanka Kuwait, isagoo sidoo kale booqan doona waddamada Sacuudiga iyo Qadar.
Tillerson waxa uu Kuwait kula kulamay saraakiil sar sare oo ka tirsan xukuumadda Kuwait, waxa uu kala hadlay dadaalada socda ee ku aadan xallinta khilaadka waddamada Khaliijka.
Tillerson ayaa booqashadiisa Kuwait kaddib waxa uu sidoo kale booqan doonaa waddamada Qadar iyo Saudi Arabia, sida ay sheegtay waaxda arrimaha dibadda Mareykanka.
Saudi Arabia, Imaaraadka Carabta, Bahrain iyo Masar ayaa xiriirka u jaray Qadar 5-tii bishii June oo ay ku eedeeyeen in ay taageero siisay argagixisada inkastoo dhammaan eedahaas ay iska fogeysay xukuumadda Dooxa, iyagoo xayiraad xagga dhulka, badda iyo cirka saaray waddankaas.
Mareykanka ayaa taageeray dadaaladda dowladda Kuwait, balse Tillerson ayaa socdaalkiisa waxa uu la xiriira sidii uu uga qeyb qaadan lahaa xiisadda ka taagan waddamada Khaliijka.
Tillerson ayaa Bishii la soo dhaafay ugu baaqay dowladda Sacuudiga in ay dabciso xayiraadda saaran Qadar, isagoo ku tilmaamay in ay ka dhalan karto xadgudub xagga aadanaha.
In ka badan, 11,000 oo ciidamo Mareykan ah ayaa ku sugan waddanka Qadar gaar ahaan saldhigga cirka ee Al Cudeyd waxaana ka howlgala in ka badan 100 diyaaradaha dagaalka.
