Kulan looga hadlayay sidii shacabka ay gacan uga siin lahaayeen ciidamada nabad geliyada degmada Xamarweyne xoojinta amniga ayna ka qeyb galeen mas’uuliyiin iyo saraakiil ciidan ayaa maanta lagu qabtay Muqdisho.
Kulanka oo uu soo qaban qaabiyay maamulka degmada Xamarweyne ee gobolka Banaadir ayaa waxaa looga hadlay sidii loo xoojin lahaa wada shaqeynta ka dhaxeyso ciidanka booliska iyo shacabka degmadaasi ku nool, kaasi oo ku saabsan in si wada jir ah looga hortago cidkasta oo loo arko inay abuureyso falal amni darro ah.
Guddoomiye ku-xigeenka dhanka amniga iyo siyaasadda ee degmada Xamarweyne Maxamed Axmed Iidoow ayaa sheegay in u jeedka kulanka uu yahay sidii loo xoojin lahaa wada shaqeynta ka dhaxeyso ciidamada amniga iyo shacabka degmada ku nool.
Taliyaha saldhigga booliska ee degmada Xamarweyne Gaashaanle Sare Maxamed Maxamuud Maxamed Garaar ayaa tilmaamay in wada shaqeyn ay iminka kala dhexeyso shacabka degmada ku nool, balse loo baahanyahay in la xoojiyo wada shaqeyntaas.
Guddoomiyaha degmada Xamarweyne ee gobolka Banaadir Cabdiqaadir Maxamed Cabdiqaadir ayaa ka codsaday shacabka degmada inay kaalin mugleh ka qaataan sugidda amniga, ayna xoojiyaan wada shaqeynta ka dhexeyso ciidamada iyo bulshada, si looga hortago dadka falalka amniga darrada ah abuuraya.
