Maamulka Deegaanka Bitaale ee Gobalka Mudug oo maalmihii u danbeeyay ku howlanaa baadi goobka geel ay lahaayeen xoolo dhaqato ka soo jeeda deegaannada Puntland, kaas oo soo galay deegaanno hoostaga Bitaale ayaa ku guuleeystay in ay soo qabtaan 12 neef oo geel ah
Guddoomiyaha Deegaanka Bitaale Cabdi Aadan Cabdile oo u waramay Warbaahinta Qaranka isagoo ku sugan deegaanka Qodgaashaan oo hoostaga Bitaale qiyaas ahaan 28 KM kaga beegan dhanka waqooyi ayaa sheegay in 12 neef oo geel ah, isla markaana kasoo anbaday deegaanno ka tirsan Puntland ay dib ugu wareejiyeen dadkii iska lahaa, isagoo xusay in goobta lagu wareejinayay ay goob joog ka ahaayeen ciidanka booliska deegaanka Bitaale oo iyagu mudooyinkii u danbeeyay door weyn ka qaatay xalinta dhibaatooyin ka soo noq noqday deegaannada Miyigii, kuwaa oo ka dhashay muranka xoolaha iyo daaqsimeedka
Guddoomiyaha Deegaanka Bitaale Cabdi Aadan Cabdile ayaa sidoo kale sheegay in ka maamul ahaan ay markasta ku dadaalayaan ka shaqeynta nabadda iyo wada noolashaha bulshada xoolo dhaqatada ah ee kasoo kala jeeda maamulada Galmudug iyo Puntland
