Golaha Mihnadlayaasha Caafimaadka Qaranka (NHPC), oo ah gole madax banaan oo ay shaqadoodu tahay in ay bulshada ka ilaaliyaan xadgudubyada ka dhasha howlgallada Caafimaadka, horumarinta anshaxa xirfadlayaasha caafimaadka, diiwaangalinta iyo ruqsad siinta mihnadlayaasha caafimaadka iyo nidaaminta hab-dhaqankooda xirfadeed iyo sidoo kale xaqiijinta badqabka iyo tayada adeegyada caafimaad ee la siiyo bulshada Soomaaliyeed ayaa maanta munaasabad lagu aahfurayey lagu qabtay Muqdisho.
Munaasabadda daahfurka Golaha Mihnadlayaasha Caafimaadka Qaranka waxaa ka soo qeybgalay Madaxda Wasaaradda Caafimaadka iyo daryeelka Bulshada Xukuumadda Federaalka Soomaaliya, Wasiiro heer Federaal iyo heer dowlad gobleed , Xildhibaanno ka tirsan labada aqal, Madax ka socota Hey’addaha kale ee Dowladda iyo Hey’addaha Caalamiga ah ee ka shaqeeya howlaha Caafimaadka Soomaaliya waxaana ugu horeyn madasha looga hadlay muhiimada uu golahan u leeyahay dalka.
Wasiirka waxbarashada Xukuumada Federaalka Soomaaliyq mudane Faarax Sheekh Cabduqaadir, ayaa xusay in la helo cid maamusha adeegyada caafimaad ee dalka ka jira ay qeyb ka tahay amniga Qaranka iyo badbaadinta bulshada.
Wasiirka Caafimaadka iyo daryeelka bulshada Xukuumadda Federaalka Soomaaliya Dr Cali Xaaji Aadan oo si rasmiya u daahfuray Golaha Mihnadlayaasha Caafimaadka Qaranka ayaa sheegay in laga bilaabo maanta aysan jiri doonin Dr Fanaxyo bulshada Soomaaliyeed ku dhibaateeya magaca caafimaadka iyo kalkaaliye shisheeye oo loo soo kireysto dhakhtar ahaan isla markaana bulshada Soomaaliyed dhibaateeya .
Golaha Mihnadlayaasha Caafimaadka Qaranka oo ka kooban 15 xubnood lagana soo kala xulay Wasaaradaha Caafimaadka, Waxbarashada iyo tacliinta sare, cadaaladda, iyo dhammaan ururadda mihnadlayaasha Caafimaadka dalka, ayaa waxay diiradda saari doonaan inay bulshada Soomaaliyeed ka ilaaliyaan ku-takri-falka adeegga caafimaadka iyo horumarinta heerarka anshaxa ee xirfadlayaasha Caafimaadka Soomaaliya.
