Xukuumadda Jamhuuriyadda Federaalka Soomaaliya waxa ay cambaareyneysaa weerarada daran ee ka dhanka ah muwaadiniinteeda , laguna boobayo hantidooda iyo shirkadahooda .
Dowladda iyo Shacabka Soomaaliya waxaa naxdin ku noqotay xadgudubyada ka dhanka ah muwaadiniinta Soomaaliyeed , iyadoo la ogsoon yahay taageerada xoogan ee Soomaaliya ay u fidisay loolankii dheeraa ee guuleystay ee Koonfur Afrika ay ku diidaneed midab takoorka.
Related posts
Taariikhdu waxa ay marqaati ka tahay tallaabooyinka Shacabka iyo Xukuumadda Soomaaliya ay u qaadeen si loo sugo xoriyadda Shacabka walaalaha ah ee Koonfur Afrika , waxaa lagu bixiyay dadaalkaasi hanti iyo taageero dhinacyo badan leh si loo gaaro Koonfur Afrika oo xor ah .
Madaxweynihii hore ee Jamhuuriyadda Soomaaliya Jaalle , Maxamed Siyaad Barre waxa uu yiri ” Gobonimada iyo Xoriyadda aan heysanno wax micno ah ma lahan iyo faa’ido , xilli walaalaheena South Africa ay yihiin kuwa la dulmiyay oo ka xaniban xuquuqdoodii oo aaney laheyn aaya-katashi, annaga iyo wadamada Afrika waxaanu laba laabi doonaa dadaalkeena si aan caalamka ugu baraarujinno xaaladda halista ah ee ka taagan Koonfur Afrika , waxaa waajib nagu ah inaan taageero farsamo iyo mid niyad ah aan u fidinno dhaq dhaqaaqyada xornimo-doonka Afrika , si dal waliba oo Afrika ah uga xoroobo kuwa boobaya kheyraadka , dhaawacna u geysanaya karaamada iyo sharafta Afrika”.
Sidaas darteed , dhaqankaasi colka ku ah shisheeyaha iyo badownimada ay muujiyeen kooxda xadgudubyada soo noq-noqday geysaneysa ma ahan mid la aqbali karo. waxaanu soo dhoweyneynaa faragelinta degdega ah iyo cambaareeynta uu jeediyay Madaxweynaha Koonfur Afrika Jacob Zuma, oo todobaadkan ka hor sheegay βββBaarlamaanka in Dowladiisa aaney cafin doonin dadka geysta weeraradan oo kale ee ka dhanka ah dadka rayidka ah ee sida wacan u shaqeysanaya ee degan Koonfur Afrika, annagu waxaanu taageereynaa hadalka Madaxweynaha ee ah in weerarada noocani oo kale aan loo sameyn karin marmarsiinyo.
Sidaas darteed , waxaanu ugu baaqeynaa Dowladda aanu walaalaha nahay ee Jamhuuriyadda Koonfur Afrika inay qaado tallaabooyinka degdega ah ee Lagama maar-maanka ah si loo hakiyo weeraradan ka dhanka ah muwaadiniinta , lana maxkamadeeyo dhammaan dadka ku lugta leh dambiyadan.
DHAMMAAD
