Xulka Australia oo marti galineysay koobka qaarada Aasiya ayaa ku guuleystay koobkiisii ugu horeeyay ee Aasiya,ka dib markii uu 2-1 uga badiyay xulka South Korea.
Ciyaartan oo ka dhacday magaalada Sydney ayaa looga adkaaday xulka South Korea oo labo mar horey ugu guuleystay koobkan.
Xulka Australia ayaa goolka la hor maray,waxaana dhamaadkii qeybtii hore ee ciyaarta u dhaliyay ciyaaryahan Massimo Luongo,sidasi ayaana lagu kala nastay qeybtii hore ee ciyaarta.
Ciyaaryahan Heung-Min Son ayaa dhamaadkii ciyaarta gool barbardhac ah u dhaliyay xulka South Korea,waxaana ciyaarta lagu daray 30-daqiiqo oo dheeraad ah.
Ciyaaryahan James Troisi oo bedel ku soo galay ciyaarta ayaa daqiiqadii 105-aad ee waqtigii dheeriga ahaa ee ciyaarta goolka labaad ee guusha u dhaliyay xulka Australia.
Xulka Australia ayaa sanadkii 2006 ku biiray xiriirka kubadda cagta ee qaarada Aasiya.
Xulka South Korea ayaa guul dareystay afartii Final ee ugu dambeysay,waxana ugu dambeysay oo uu koobkan ku guuleysto sanadkii 1960-kii.
