Xaflad si heer sare loo soo agaasimay, oo ay ka qeyb galeen xubno ka tirsan labada gole ee dowladda, isla markaana lagu xusayay maalinta dhallinyarada Soomaaliyed ee 15-ka May ayaa lagu qabtay xarunta maamulka Ximan iyo Xeeb degmada Cadaado ee Gobolka Gaduud.
Munaasabadda waxaa kaloo ka qeyb galay qaar ka mid ah musharaxiinta u taagan qabashada xilka Madaxtinimo ee Gobollada Mudug iyo Galgaduud, qeybaha kale ee bulshada iyo marti sharaf kale, iyadoo intii ay socotay xafladda lagu soo bandigay suugaan ka turjumeysa ahmiyadda ay maalinta oo kale u leedahay bulshada.
Ugu horeyn waxaa xafladda daahfuray guddoomiyaha gobolka Galgaduud Xuseen Welhliye Cirfo ayaa hambalyo u diray dhallinyarada Soomaaliyeed meelkasta oo ay jogaan, waxaana uu intaa ku daray in maamulkiisa gobolka uu dhiiri gelinayo sidii ay dhalllinyarada uga qeyb qaadan lahaayeen horumarka gobolka.
Dr Maxamed Cilmi Afrax oo ka mid ah musharaxiinta u taagan qabashada xilka Madaxtinimada ee Gobollada Mudug iyo Galgaduud oo isna munaasabadda ka hadlay ayaa hambalyo iyo bogaadin u diray dhallinyarada Soomaaliyeed meelkasta oo ay joogaan munaasabadda 15-ka May awgeed, isagoo ugu baaqay dhallinta in ay ka faa’iideystaan fursadaha ay maanta haystaan oo ay ka qeyb qaataan horumarka dalka.
Madaxweynaha Maamulka Ximan iyo Xeeb C/laahi Cali Maxamed (baarleex) ayaa tilmaamay in uu aad ugu faraxsanyahay ka qeyb galka munaasabadda lagu weynaynayo xuska 15-ka May.
Wasiirka Arrimaha gudaha iyo Federaalka ee Xukuumadda Soomaaliya Mudane Cabdiraxmaan Xuseen Maxamed (Odowaa) ayaa tilmaamay in xukuumaddu ay dhiir gelinayso sidii shaqo abuur loogu sameyn lahaa dhallinyarada, waxaana uu intaa ku daray in dhallinyarada looga fadhiyo sidii ay uga qeyb qaadan lahaayeen horumarka iyo dib u dhiska dalka.
Munaasabadda ayaa ku soo idlaatay jawi farxadeed.
