Munaasabadaan lagu weynayay dhalashada Nabigeenna Muxamed (NNKH) oo ay ka qeyb galeen Sheekh Sayid Sheekh Aba Cali, Sheekh Xasan Sheekh Aadan Sheekh Xasan Basra iyo culimo kale oo aad u fara badan oo ka kala yimid Gobollada Banaadir iyo Shabeelaha Hoose ayaa maanta lagu qabtay Mowlaca Sheekh Daa’uud Culusow ee degmada Warta Nabadda.
Munaasabadda ayaa intii ay socotay waxa ay culimadu ka sheekeeyeen taariikhda dhalashada Nabigeenna Muxamed (NNKH), iyagoo bulshada ugu baaqay in ay u istagaan weyneynta dhalashada Nabigeennada oo sanadkasta bisha oo kale laga xuso dunida Muslimka.
Sheekh Maxamed Daa’uud iyo Sheekh Axmed Macalin Daahir Sheekh Daa’uud ayaa tilmaamay in ay aad ugu faraxsanyihiin in bulshada la fahamsiiyo ahmiyadda bishan oo kale ay u leedahay, waxaana ay xuseen in ay sii wadayaan sidii bulshada loo bari lahaa taariikhda dhalashada Nabigeenna Muxamed (NNKH).
Ugu dambeyntii Sheekh Sayid Sheekh Aba Cali ayaa kula dar daarmay bulshada Soomaaliyeed meelkasta oo ay joogaan inay ka shaqeeyaan midnimada Shacabka.
Sawir Qaade:- Qadar Cali Nuur
