Wasaaradda Caafimaadka Dowlad Gobaleedka Koonfur Gobaleedka Soomaaliya gaar ahaan Waaxda Caafimaadka Qoyska iyo Adeegyada Bukaan Socodka, ayaa qabatay Munaasibada Xuska Maalinta Caalamiga ah ee Badqabka Bukaanka.
Munaasibada Xuska Maalinta Caalamiga ah ee Badqabka Bukaanka waxaa ka soo qeybgalay Wasiirka ku-xigeenka Wasaaradda Caafimaadka Dowlad Gobaleedka Koonfur Gobaleedka Soomaaliya mudane Osman Abdi Muse, Agaasimayaasha Waaxyaha, shaqaalaha kale Wasaaradda, madax ka socotay hay’adaha caalamiga iyo kuwa gudaha ah, Dhaqaatiirta iyo shaqaalaha kale ee Caafimaad ee ka howlgala xarumaha Caafimaad.
Related posts
Maalintaan, ayaa la xusaa sanad walba 17 September waxaana loogu talagalay in kor loogu qaado ogaanshiyaha badqabka bukaanka, iyadoo sanadkaan munaasibada xuska maalintaan halhays looga dhigay ”DAAWEYN AAN WAXYEELA LAHAYN.
Ugu horreyn waxaa furay munaasibada Wasiir ku xigeenka Wasaaradda Caafimaadka Mudane Cumar Cabdi Muuse waxuuna ka sheekeeyay muhiimada ay lee dahay in la ilaaliyo badqabka bukaanka, waxuuna macno iyo miisaan weyn ku sheegay mowduuca xuska sanadkaan haddii ay ka dhabeeyaan shaqaalaha Caafimaadka in ay tahay guul weyn oo laga gaaray sare u qaadida badqabka bukaanka.
Agaasimaha Waaxda Caafimaadka Qoyska iyo Adeegyada Bukaan Socodka Naima Ahmed Addow ayaa sheegtay in badqabka bukaanka uu yahay qorshaha ugu horeeya ee la tacaalida bukaanka si looga ilaaliyo khatar dambe oo ka timaada daaweynta, waxayna fariin u dirtay dhamaan shaqaalaha caafimaad ee ka howlgala xarumaha caafimaad ee ku yaal dhamaan Degmooyinka iyo Gobolada Dowlad Gobaleedka Koonfur Gobaleedka Soomaaliya in ay ka shaqeeyaan sare u qaadida badqabka bukaanka iyadoo loo maraayo ka hortag, la tacaalid iyo la socoshada badqabka bukaanka.
Gunaanadkii munaasibada waxaa la isku raaacay in shaqo wadareed laga qabto adeeg bixinta bukaanka, ilaalinta waxyeelada dawooyinka iyo wacyigelinta bulshada ee khataraha ka dhasha daawooyinka aanan dhaqaatirtu qorin.
