Munaasabad lagu weyneynayay Xuska Maalinta Caalamiga ah ee Wacyigelinta miinooyinka ayaa maanta lagu qabtay Muqdisho, kaasi oo ay ka qeyb galeen Wasiiru dowlaha Wasaaradda Amniga Agaasimaha Guud ee Wasaaradda Amniga, Agaasimaha Guud ee Hay’adda SEMA, Wakiilo ka kala socday Hay’ado Caalami ah oo ka shaqeeya arrimaha miino baarka iyo marti sharaf kale.
Agaasimaha Guud ee SEMA Daahir Cabdiraxmaan oo ugu horeyn madasha ka hadlay ayaa sheegay inay jiraan qorsheyaal lagu ciribtirayo miinada iyo waxyaabaha qarxa.
“Anigoo ku hadlaya magaca Hay’adda Maareynta Miinooyinka ee SEMA waxaa farxad inoo ah inaad nalaga qeybgashaan xuska munaasabadan Caalamiga ah, hal ku dhigeennu waa Dhul Nabdoon, guri Nabdoon iyo socod Nabdoon”. Ayuu yiri Agaasime Daahir.
Yuuwuf Cali Maxamed Agaasimaha Guud ee Wasaaradda Amniga Gudaha ee Xukuumadda Federaalka Soomaaliya ayaa sheegay in shanta sano ee soo socota la xoojin doono ka sifeynta dalka miinooyinka.
Mas’uuliyiin ka kala socday dowlad Goboleedyada iyo hay’adaha Caalamiga ah oo madasha ka hadlay ayaa qiray in miinooyinka qatar badan ay ku hayaan bulshada, loona baahanyahay in si wada jir ah looga sifeeyo dalka.
Wasiiru dowlaha Wasaaradda Amniga Gudaha Xukuumadda Federaalka Soomaaliya Mudane Farxaan Cali Axmed ayaa sheegay in miinooyinka ay dhibaato badan ku hayaan bulshada, isla markaana saameyn ku yeelatay dadka reer guuraaga ah iyo Xoolo dhaqatada intuha.
Wasiirka ayaa xusay inay jiraan qorsheyaal lagu caawinayo dadka ku naafoobay miinooyinka, loona baahanyahay inay la soo xiriiraan hay’adda SEMA, si loo caawiyo.
“Sanadkiii 2006-da ayay Golaha Ammaanka ee Qaramada Midoobay waxa ay u aqoonsatay maanta oo kale 4ta April Maalinta Caalamiga ah ee Wacyigelinta miinooyinka iyo wax ka qabashada miinada, waxaana naga go’aan inaan dalka ka nadiifino haraadiga hubka iyo miinooyinka”. Ayuu yiri Wasiir Farxaan.
Wasiir farxaan ayaa hadalkiisa ku soo gabo gabeeyay hal ku dhigga sanadkan oo ah “Dhul Nabdoon, Socod Nabdoon iyo Guri Nabdoon”.
