Munaasabad lagu weyneynayo maalinta Dhalinyarada Soomaaliyeed ayaa hadda ka socota magaalada Muqdisho, iyadoo ay ka qeyb galayaan madax ka tirsan Dowladda Soomaaliya oo ay ugu horeeyaan Madaxweynaha Jamhuuriyadda Federaalka Soomaaliya Mudane Xasan Sheekh Maxamuud.
Munaasabada oo caawa ka socota magaalada Muqdisho oo ay ka qeybgalayaan Dadweyne aad u fara badan oo isaga kala yimid degmooyinka Gobolka Banaadir, kuwaa oo badankoodu ku labisan dhar astaan u ah isboortiga maadaama maalinta Dhalinyarada Soomaaliyeed ay tahay.
Munaasabadda ayaa hada waxaa lagu soo bandhigayaa Heeso ka turjumaya Halganka Dhalinyaradii gobanimo doonka ee SYL iyo doorka Dhalinyarada Soomaaliyeed oo ay u riyaaqeen ka qeyb galayaasha munaasabadda.
Maxamed C/laahi Xassan Nuux oo ah wasiirka dhalinyarada iyo cayaaraha xukuumada Soomaaliya oo ku sugan halka munaasabadda ay ka dhaceyso ayaa Radio Muqdisho goordhow ugu waramay munaasabadda iyo ahmiyadda maalintaan ay u leedahay Shacabka Soomaaliyeed , isagoo sheegay inay tahay maalin la oran karo inuu bidhaamay iftiinkii ifafaalaha nabada Soomaaliya,wuxuuna Wasiirka Hambalyo u diray mar kale dhalinta Soomaaliyeed.
