Wasiirka Wasaaradda Batroolka iyo Macdanta ee Xukuumadda Federaalka Soomaaliya, Mudane Daahir Shire Maxamed, ayaa magaalada Cape Town kulan kula yeeshay wasiirrada dhiggiisa ah ee dalalka Kenya iyo Tanzania, xilli uu ka qeybgalayay Shirka Maalgashiga Macdanta.
Kulanka waxaa ka qeybgalay Wasiirka Macdanta, Dhaqaalaha Buluugga ah iyo Arrimaha Badaha ee Kenya, Mudane Hassan Ali Joho, iyo Wasiirka Macdanta ee Tanzania, Mudane Anthony Peter Mavunde (MP).
Saddexda wasiir ayaa ka wada hadlay fursadaha maalgashi ee ka jira dalalkooda, iyagoo si qoto dheer u falanqeeyay kheyraadka dabiiciga ah iyo noocyada kala duwan ee macdanta ay hodanka ku yihiin Soomaaliya, Kenya iyo Tanzania. Waxa ay sidoo kale isla meel dhigeen xoojinta iskaashiga saddex-geesoodka ah ee ku aaddan horumarinta iyo maareynta kheyraadka dabiiciga ah.
Shirka ayaa diiradda lagu saaray dardargelinta maalgashiga, kor u qaadista wax-soo-saarka gudaha, iyo hubinta in kheyraadka si waara oo cadaalad ah looga faa’iideysto, si looga dhaliyo horumar dhaqaale iyo shaqo-abuur ka hirgala dalalka iyo guud ahaan qaaradda Afrika.
