Cape Town – Koonfur Afrika: Wasiirka Wasaaradda Batroolka iyo Macdanta ee Xukuumadda Federaalka Soomaaliya, Mudane Daahir Shire Maxamed, ayaa kulan miro-dhal ah kula yeeshay magaalada Cape Town madax ka socotay Empire Investment Bank, oo ah bangi caalami ah oo maalgelin ku sameeya shirkadaha macdanta kana xaraysan dalka Shiinaha, iyo Madaxweynaha Rugta Ganacsiga Koonfur Afrika, AdV Mtho Xulu.
Kulanka ayaa ka dhacay Cape Town, halkaas oo Wasiirku uga qeybgalayay Shirka Maalgashiga Macdanta Afrika. Wasiirka waxaa kulanka ku wehlinayay Safiirka Jamhuuriyadda Federaalka Soomaaliya u fadhiya Koonfur Afrika, Danjire Maxamed Sheekh Isxaaq.
Intii uu kulanku socday, Wasiir Daahir Shire Maxamed ayaa si faahfaahsan u soo bandhigay kheyraadka macdanta iyo kan dabiiciga ah ee uu dalku hodanka ku yahay, isagoo sharaxay fursadaha maalgashi ee ka jira Soomaaliya. Madaxda Empire Investment Bank iyo Madaxweynaha Rugta Ganacsiga Koonfur Afrika ayaa soo dhaweeyay warbixinta wasiirka, iyagoo muujiyay xiisaha ay u qabaan maalgashiga Soomaaliya.
Ugu dambeyn, kulanka ayaa ku soo dhammaaday is-afgarad, iyadoo lagu heshiiyay in kulamo kale lagu qabto gudaha Soomaaliya si loo sii xoojiyo wadahadallada la xiriira maalgashiga macdanta iyo kheyraadka dabiiciga ah.
