Afhayeenka Ciidanka Boliiska Soomaaliyeed Gaashaanle Sare Qaasim Axmed Rooble oo la hadlay Radio Muqdisho ayaa ugu baaqay ganacsatada ku ganacsada hareeraha wadooyinka in ay tixgaliyaan islamarkaana ay u dhaga nuglaadaan awaamiirta ciidamada xiliyada ay sugayaan ammaanka.
Afhayeenka ayaa waxa uu sheegay in loo baahan yahay in ay wada shaqeeyaan ciidamada iyo dadka Shacabka ah si loo gaaro horumar amni, waxaana uu tilmaamay maalmaha soo socda in magaalada Muqdisho ay ka sameyn doonaan howlgalo ammaanka lagu xaqiijinayo.
Gaashaanle Sare Qaasim Axmed Rooble oo hadalkiisa sii wata ayaa waxa uu sheegay wadooyinka ciidamada ay ka howl gali doonaan in aan lagu ganacsan Karin hareeraha wadooyinka, waxaana uu ka raali galiyay hakadkaasi ganacsigoodu ku yimid, waxaa ganacsatada in ay u dulqaataan howshaasi ciidamada ammaanka ay sameyn doonaan taasi oo muhiim u ah danta umadda Soomaaliyeed.
Ciidamada ammaanka ayaa lagu arkayaa isgoysyada iyo wadooyinka magaalada Muqdisho kuwaa oo sugaya ammaanka magaalada Muqdisho oo saacadaha soo socota uu ku soo wajahan yahay madaweynaha dalka Turkiga, iyadoo wadooyinka magaalada Muqdisho lagu xardhay calanka Soomaaliya iyo kan Turkiga taasi oo lagu muujinayo sida dadka Soomaaliyeed ay ula dhacsan yihiin caawimaada dadka Soomaaliyeed ay siineyso Dowladda Turkiga.
