30 January, 2015, Addis Ababa: Shir madaxeedka waddamada Midowga Afrika ayaa maaanta waxaa uu si rasmi ah uga furmey caasimadda dalka Ethiopia ee Addis Ababa. Madaxweynaha Jamhuriyadda Federaalka Soomaaliya Mudane Xasan Sheekh Maxamuud ayaa ka mid ahaa hoggaamiyeyaasha Afrika ee ka qeybgaley shirka .
Kulan madaxeedkan 24aad ee Midowga Afrika, ayaa waxaa si rasmi ah u furtey Guddoomiyaha Guddiga Sare ee Midowga Afrika Nkosazana Dlamini Zuma.
Related posts
Shirkan oo madaxda qaaradda Afrika ay ku lafagurayaan arrimo kala duwan ayaa halkudhigga sannadkan uu yahay in la xoojiyo awoodda dumarka qaaradda Afrika ee dhinacyada kala duwan, sida siyasadda, arrimaha bulshada, dhaqaalaha iyo kuwo kale.
Xoghayaha Guud ee Qaramada Midoobay Ban Ki Moon, Madaxa Guddiga Sare ee Midowga Afrika Nkosazana Zuma, Guddoomiyaha Meertada ah ee Midowga Afrika , Mohamed Ould Abdulaziz,ahna Madaxweynaha Mauritania iyo madaxda kale ee ka hadashey shirka ayaa soo dhoweeyay dadaalka dowladda Soomaaliya ee nabad ka aslaaxinta dalka iyo dagaalka lagula jiro kooxaha argagixisada.
Xoghayaha Guud ee Qaramada Midoobay Mr Ban ayaa sheegay in hawlgalada nabad ilaainta Midowga Afrika ay yihiin kuwo miro dhal ah, isagoo tusaale u soo qaatey hawlgalka AMISOM ee dalka Somalia.
Madaxweynaha Soomaaliya Mudane Xasan Sheekh Maxamuud ayaa shirka ka sokow waxaa uu kulamo la qaatey diblomaasiyiin shisheeye oo ay ka wadahadleen xaaladda Soomaaliya iyo taageerada ay u hayaan barnaamijka dowladda Federaalka Soomaaliya ee dhinacyada siyaasadda, nabadgelyada iyo fidinta adeegyada bulshada.
Ugu dambeyntii Guddoomiyaha Meertada ee Midowga Afrika ahna Madaxweynaha dalka Mauritania Mohamed Ould Abdel Aziz ayaa xilka Guddoomiyenimo ku wareejiyay Madaxweynaha Dalka Zimbabwe Robert Mugabe.
