Munaasabad lagu dhawaaqayay Machadka SKY oo maanta loo badalay Jaamacad, ayaa waxaa ka qeyb galay Xildhibaanno, Aqoonyahanno, Qeybaha Bulshada, Ururada Haweenka Qaranka, kan Gobolka Banaadir, Dhallinyarada Qaranka, Daladaha Waxbarashada ee ka dhisan caasimadda iyo marti sharaf kale ayaa maanta lagu qabtay Muqdisho.
Munaasabadda oo isugu jirtay Qalin Jebin Dufcaddii Saddexaad ee Machadka SKY oo kala ah: Diploma of IT, Diploma of Nutrition, Diploma of Secretary iyo Computer Applications oo ay ka qalin jebinayeen ilaa iyo 79 arday iyo ku dhawaaqista Jaamacadda SKY ayaa xubnihii ka hadlay waxa ay sheegeen in ay aad u soo dhaweynayaan hirgelinta Jaamacadda SKY ee laga hirgeliyey Degmada Heliwaa ee Gobolka Banaadir.
Guddoomiyaha Jaamacadda SKY Maxamed Macalin Xasan (Maxamed Yare) oo ka hadlay ku dhawaaqista magaca Jaamacadda ayaa sheegay in ay u fureen sidii ay u dabooli lahaayeen baahida waxbarasho ee ka jirta Degmaa Heliwaa, gaar ahaan dhanka arrimaha tacliinta sare, isagoo xusay in ay sare u qaadayaan tacliinta sare ee dalka.
Guddoomiyaha Degmada Heliwaa Maxamed Axmed Xaashi (Qoslaaye) oo ka hadlay ku dhawaaqista Jaamacadda ayaa tilmaamay in uu aad u soo dhaweynayo in degmada laga hirgeliyo Jaamacaddii ugu horeysay, isagoo ku baaqay in dhalinta ay u istaagto waxbarashada.
Guddoomiye ku-xigeenkii hore ee Jaamacadda Lafoole ee dhanka Waxbarashada Siraaji Canshuur oo isna goobta hadal ka jeediyay ayaa maamulka sare ee Jaamacadda ku booriyay in ay sare u qaadaan tacliinta sare ee dalka.
Xildhibaan Prof. Maxamed Cumar Dalxa ayaa ka sheekeeyay machadka SKY heerarkii waxbarasho ee uu soo maray, waxaana uu si rasmi ah ugu dhawaaqay in laga bilaabo maanta machadka SKY loo badalay Jaamacadda SKY, uuna soo dhaweynayo sare u qaadista tacliinta sare ee dalka.
Madaxa xiriirka ee Jaamacadda SKY, Cumar Muxidiin Cabdulle (Sero) ayaa sheegay in Jaamacaddu ay furantahay, isla markaana ay socoto isdiiwaangelinta ardayda cusub.
