Maamulka gobalka galgaduud ayaa dowlada Somaaliya iyo hay’adaha samafalka ugu baaqay in gargaar deg deg ah la gaarsiiyo dadkii dhawaan ka barkacay degmada Guriceel ee gobalkaasi, kuwaasoo duruufo nololeed ay xiligani heysato.
Qaar ka mid ah waxgaradka iyo aqoonyahanada ku nool gobolka Galgaduud oo ka hadlayay dhibaatada haysata dadkii ku barakacay deegaannada hoostaga Degmada Guriceel ayaa sheegay inay jirto xaalado nolol xumo oo haysata qoysaskii ay saameeyeen shaqaaqo dhawaan halkaasi ka dhacday.
Dadkan ayaa waxa ay codsadeen in kaalmo beni’aadanimo lala soo gaaro qoysaska ay mashaqadu ku habsatay, gaar ahaan dadkii ku barakacay dagaaladaasi.
Waxgaradka ayaa si wada jir ah u sheegay: “Waxaan ugu baaqaynaa dowladda Federaalka ah ee Soomaaliya iyo hay’adaha samafalka inay kaalmo soo gaarsiiyaan qoysaska ay dhibaatada ku haysato deegaannada loo barakacay, meelaha qaar xaalado beni’aadanimo oo aad u liidata ayaa laga soo sheegayaa, waxaana codsaneynaa in kaalmo lala soo gaaro dadkani”
Mas’uul ka tirsan maamulka Gobolka oo isna la hadlay Radio Muqdisho ayaa sheegay in xaalado nololeed ay haysato qoysaska ka barakacay Guriceel, isagoo baaq u jeediyay bulshada qeybaheeda kala duwan si gurmad loogu fidiyo qoysaska barakacayaasha ah.
